Heiyatoh wa i thang bomkala kam chibynta i lehkmen Diwali ha ka 4 tarik uni u bnai hapoh waroh kawi ka East Khasi Hills, neiliang ka District Magistrate da pynmih ko ya ki kyndon yow lait u tngit u jakhlia ka la-ær, ki luti syngkieñ kamjooh yow lait u chah ktah nei ood wei sawa wa mih nei thang bomkala wa boon jait.
Kamtæ katkam ka hukum wa pynmih da ka Supreme Court ha ka 29-10-21 da kdaw wa i thang bomkala kynroi bha ko ya ka la-ær wei hajrong ini da sñiaw wa emkaam wow booh kyndon hawa thang bomkala.
Hajrong ini da khang yei dai wei wow thied ya ki bomkala wa wanrah na baar ri, i pyndait lang ya ki bomkala ter iwa pynood bha yei sawa kamjooh iwa pyntngit bha yei chnong i thaw.
Da khang leh wow pynemkaam ya ki bomkala wa ye u ood palat 125DB (AI) lane 145 dB (C) pk hawa em 4 meter nei thaw wa pynpdung.
Da khang wow thang bomkala 100 meter na ki thaw wa em Hospital, Nursing Home, Primary wa District Health Care Centres, ki thaw puræ, ki yung bichaar, ki thaw mane wa kiwi de ki thaw wa da pynbna kam ki Silent Zone da ki bor sorkar.
Chooh chooh da pyntip wa i thang bomkala u chah nadooh 8:00 waje i miet hadooh 10:00 waje i miet ha katai ka sngi.
Da pyntip leh wa i dai bomkala toh du ba kitu kiwa da yoh License wei toh u dai du ki jait bomkala wa da chah donhi kiwa bood ya ki kyndon ka Central Pollution Control Board.