U President ka National People’s Party (NPP) uwa man leh u Montri Rangbah ka jylla, u Conrad Kongal Sangma da ong u wa ka Election chiteiñ samoi toh kawa jwat bha neibynta ka Party, khamtam ha ki 2 tylli ki Constituency kiwa ka NPP da jop toh kiwa da ksoh da ka seiñ Congress kawa toh leh ka Liang Pyrchah.
Da ong u wa ha waroh kini ki Constituency, kitæ ka Rajabala wa Mawryngkneng, ka NPP da poi ko hei wa 3 næ wa 4 ha i por Election, wei katni ha Rajabala da ku bar ha u snem 2018 da palat 7000 Vote, wei kamjooh leh da man ha Mawryngkneng.
Da ong u wa ka yakhun man ko kawa jwat, tangwa ki paidbah da e ki yei chaniah ha ka NPP wa ha ka sorkar MDA, wei ini toh hajrong ki phang krehkaam wei kamjooh ki kaam wa kani ka sorkar synrop wa da yahkhmat da ka NPP wa da leh ko.
Da ong u wa ha ka Election kawa em i chah pynbaad ha ka Liang Pyrchah, wa ka NPP da klam che wa ka kwah bait ko wow kreh yow wanrah yei roi i paar, wei katni ki paidbah da sñiawthooh wei e ki ya ka jubab wei kam ka sorkar MDA da yoh ko yei jop ha waroh 3 tylli ki thaw.
Hawa kylli, u Conrad da ong u ka Election MLA ha ka jylla dang sah sa palat 1 snem tam, wei ym ye wow batai chwa yeiyi wow jia, tangwa i mih na ka Election chiteiñ samoi toh i dak wa ki paidbah da jubab ki ya iyi wa ka sorkar da leh ko, wei kam ka sorkar ymtoh u chim stiñ wei daw hap wow kreh chitom.
Neiliang u Prestone Tynsong uwa man kam u National Vice President ka NPP, da ong u wa ka Party da yoo ko yei thmu yong ka Congress ha i por wa yalap ya ka Election, hawa lai ki cha ki paidbah du wow pynbaad ya ka sorkar MDA wa yahkhmat da ka NPP, tangwa ki paidbah yong ki 3 tylli ki Constituency man ki kiwa rap stat bar ya kitu ki bru kiwa pynbaad ya ka sorkar, deiwa pynyoo wa ki dang em ki yei chaniah ha ka sorkar wa yahkhmat da u Conrad Sangma kam u Montri Rangbah.