Ar tylli ki FIR da Register pyrchah ya u Leader of Opposition (LoP) ka Lok Sabha, u Rahul Gandhi neidaw wa pynman u ya ka yalang paidbah ha Darbhanga, Bihar ynnin ka sngi.
U Rahul Gandhi da em u ha Bihar kamwa 9 kynta wei da lai u cha Darbhanga deiwa chimbynta ha ka ‘Shiksha Nyay Samvad’ ka NSUI wa pynman ha Ambedkar Kalyan Hostel, tangwa da chah pynbaad u wa da leh yeini khlem da yoh bor na ki bor District.
Ki bor District da e bor ki wow pynman ya kani hapoh ka Town Hall, tangwa u Rahul Gandhi da lai u wow pynman yalang ha ka Ambedkar Hostel, heiwa da klam u cha ki Dalit kamwa 15 minit.
Hadien wa tip yeini, da e ar tylli ki FIR pyrchah ya u Rahul Gandhi wa kiwa boon kiwa yahkhmat ka Congress.
Ya ka FIR wa nyngkong da booh ha Laheriyasarai Police Station da u Duty Magistrate, u Khurshid Alam uwa em hei thaw wa jia ini. Ha ka ujor da ong wa da tyngkheiñ ya ka hukum wa pynmih hapoh ka Section 163 ka Bharatiya Nyaya Sanhita (BNS) kawa tip kam ka Section 144 nachwa.
Ka FIR wa ar da booh da u District Welfare Officer, u Alok Kumar uwa da pynbaad ya u Rahul Gandhi wa kiwi de wa pynman yalang yabor ki ha Ambedkar Welfare Hostel khlem da yoh bor.
Ki pulit da pynmih pyrtuid ki ya 20 ngut kiwa yahkhmat ka Congress wa kynthup ya u Rahul Gandhi ha kani ka FIR deilang wa 100 ngut ki bru.
U Rahul Gandhi hadien wa dep u wow embynta ha kini ki yalang wei wow lai pait ya ka phim Phule ha City Centre Mall, da liwan biang u cha Delhi.
Discussion about this post