U Symbood Montri Rangbah ka jylla, u Prestone Tynsong da ong u wa hei thaw wow baam doh man-ka-sngi, baam noh da i ja wa i jhoor du wow im, neibhah ym toh iwa suk ya ka sorkar wow yarap lut ya waroh kiwa chong chnong.
Hawa kylli hajrong i e yarap ka sorkar cha ki manyung wa maad yei eh neiwa pnkrehkaam ya ka Lockdown, u Prestone da ong u wa ym toh iwa suk ya ka sorkar wow e yarap kamwa da leh ha u snem wa da dep. Da ong u wa ya ka Total Lockdown toh kawa da pynkrehkaam du ynnin i miet ka 19 tarik ha East Khasi Hills, katwa waroh chi kattu da e laad ya ki paidbah wow kreh ki ya ki kaam 100 sngi wa kiwa mylla ya ki kaam chna yung.
Da kyntu u ya kiwa chong chnong wow yai chah ki chipor wa ka sorkar yow pynkut ya u kynjri yong i poor u khñiang, neibhah wa ha kam kini ki por, iwa emkaam hakhmat dooh toh i mynsien bru. Da ong u wa ha ini i por ym toh du ya kiwa dooh wa kyrdooh kiwa chem yei eh tangwa wot kiwa mahajon leh maad ki yei eh.
Hawa yatoh wa i wai ki dukan marbaam, u Tynsong da ong u wa da phah ya ki Deputy Commissioner wa ki District Surveillance Team wow ya krehlang wa ki dorbar chnong yow e laad ya kattu katni ki dukan marbaam wow wai ki ha ki chiphaw sngi wa em i khangsbak, heiwa da pyntip u wa ki dorbar chnong hadien wa da phah ya i pyrtuid yong ki dukan, neiliang ki bor District daw bichaar ki wow e bor wow wai ya ki dukan ha ki chnong.