Shillong: Ka Peoples’ Democratic Front (PDF) ynne ka sngi da phah chithi ko cha ki le ngut ki MDC yong ka Party wow pyntip biang ko wa da pyndooh yei man ki kam ki dkhot ka Party sa chi bnai, nadooh ka 7 tarik u Naikhynde hadooh ka 7 tarik u Naichiphaw, 2018 neidaw wa lai ki wow kyrchaan ya ka Executive Committee yong ka Khasi Hills Democratic Alliance (KHDA) ha KHADC wa yahkhamt da u HS Shylla, uwa man u MDC ka NPP.
Kini ki MDC kynthup ki ya u Latiplang Kharkongor MDC ka Nongthymmai, u James Sylliang MDC ka Mawhati wa u Blanding Warjri MDC ka Mawthadraishan.
Katkam ka chithi lyngba u Secretary ka PDF u Auspicious Lyngdoh Mawphlang da ong, “Ka yalang yong ka Central Executive Committee (CEC) ka Party kawa man ha ka 7 tarik uni u bnai da rai biang ko wow beh seiñ chipor ya kini ki le ngut ki MDC.”
Ya kani ka rai da chim neibhah wym ngait kini ki MDC yei rai wa chim da ka party, katkam ka chithi kawa da phah cha ki ha ka 20 Naitung (April), 2018.
“Lada phi dang em phi i mon wow kyrpaad namo wow yaklam hajrong ka rai beh seiñ, phi ye phi wow yaklam wa ki bor wa ha khlieh ka party,” da thoh ha ka chithi.
Ye wow pynkynmoo wa ha ka yalang ka Central Executive Committee (CEC) kawa man ha ka 20 Naiynñiaw, 2018 da rai wow ekti ya kani ka kaam cha ka Central Disciplinary Committee wow bichaar ya kini ki le ngut ki MDC kiwa lai kyrchaan ya ka KHDA.
Katkam ka bui ka Disciplinary Committee heiyatoh wa kini ki le ngut ki MDC, ka party da rai ko wow e da ka ‘Show Cause’ wow e por ya ki MDC ha chwa chiteiñ sngi yong ka 23 tarik u Naiynñiaw wow yachem wa kiwa kitkaam yong ka party wow pynche heiyatoh wa i leh ki.
Neibhah yei wym ye ki u pynche, ka CEC hadien ka yalang kawa da pynman ha ka 7 tarik uni u bnai kawa da bichaar bniah ya i leh yong kini ki MDC, da rai wow beh seiñ chwa chi bnai wow e laad leh ya kini ki le ngut ki MDC wow pynche ki.
Discussion about this post