Shillong: Ka Coordination Committee on International Border (CCIB) da beiñ ko ya u Deputy Commissioner ka East Khasi Hills, u PS Dkhar wa kyntait u wow yaklam wa ki.
U Secretary ka CCIB da ong u wa u Dkhar da khut yaklam u ya ki kattu katni ngut ki Sordar kiwa man leh ki dkhot ka CCIB iwa pynyoo wa oo kwah u wow tympiah ya i yatylli ka CCIB.
Da ong u wa in i leh u Dkhar pynyoo wa oo leh dang artatien u wow yachem wa ka CCIB wei wa ka yieñ skem ko hajrong ka yurim wow pynbait ya u pood u ang wei ym em pyrchah ko ya i kær naar chieh.
Heijooh i por da pynksan u wa i kær naar chieh toh u man i thij na u pood (Zero Line) khnang wow lait u dooh ya ki thaw cha ka Bangladesh.
Da ong u leh wa da em ki Sordar kiwa da pdiang ya ka bai thaw (Compensation) tangwa ymtip ki wa boon ki paidbah kiwa ood neibhah wa chiboon ki thaw yong ki daw lai ki cha ka Bangladesh.
U Myrchiang da kylli u leh yei thmu ka sorkar wow pynkrehkaam ya ka Section 40 ka Land Acquisition Rehabilitation and Resettlement Act, 2015.
Da ong u leh wa ka sorkar da lai lait ko ya ka District Council, deiwa kylli wa yi wa ong ya ki wa ka KHADC ym em u e NOC ko cha ka sorkar jylla wow kær naar chieh neibhah wa da chah ktah leh ki thaw yong ki.
U Myrchiang da kdaw u leh cha ka Hearing wa pynman ha ka 14 Naikhynde heiwa da paan ki ya ka RTI hei yatoh wa ki kyndon ki ri ka pyrthai wa ki map wa kiwi kiwi.
Da pynbaad u deiwa ong wa ka Survey Department ka sorkar ym em ko ya ki map neibhah wym ye ki u pynbiang yeini.
Discussion about this post