Jowai : Hadien ka yalang 2nd State Executive yong ka BJP Meghalaya wa da pynman ha kani ka 18 tarik, ka BJP Meghalaya da kdaw ko wa hadien 3 snem chiteiñ ka sorkar u Mukul Sangma man ko kawa tlot nadoh ki kaam poh yung hadooh ki kaam yada ya ki pood yong ka ha i psiah tooh ki bru cha ka.
Da ong ka BJP leh wa ka sorkar u Mukul da pyllut por u du hei pynbait ya ki kaam yaknieh chuki heiwa hadien wa pynhun ya kawi ka dhab wa kwah yaknieh bor da mih won sa kawi kawa kwah u pynhiar chuki oo.
Yeini wa da sdang wiar bor ka sorkar u Mukul da pynsakhiat nadooh ki election yong ka GHADC heiwa ka BJP leh deilang wa kiwi ki party da ye ki u pynrem ya ka Congress kamjooh leh ha ka Tura LS Assembly Bye Poll heiwa da rem kput ko ha ka NPP.
Ini pynyoo i ya i sur ki paidbah wa da pyrchah ki ya ka sorkar Congress khamtam yei yada u Mukul ya ka montri yong oo kawa emkti ha ka Education Scam (Biah sia lieh) ini pynyoo wa da wiar luti ko hei synchaar khaddar.
Kamjooh ka BJP leh da paan ko ya ka White Paper na ka sorkar jylla hei yatoh wa ka sarok bah NH-44 neidaw wa slem u chna ya kani ka sarok heiwa du heini wa dep leh da yap 29 ngut ki bru wei ini da jia i dei langær.
Ka BJP leh da beiñ ko yei chah lehbor ki Pnar wa em ha Bangladesh heiwa 700 ngut ki Pnar, heiwa da mih ka hukum yow mih chnong noh ki heiwa katni kini ki bru da im ki hei sier mynsein. Da ong chooh chooh leh wa ini i chah maham ki bru Pnar toh kiwa jia leh ya kiwi kiwa em ha ka niam kam ki Buddhist, Hindu wa ki Christan wa em hapoh ka ri Bangladesh, kamtæ ka seiñ Hindu-Buddhist-Christian United Forum of Bangladesh da pynsñiaw ki yei i eh i khoo yong ki heiwa da poi i cha chkoor yong u Modi wei daw rah ki ya ka leh cha ka Union Home Minister.
Kani man ko katkam ka khubor na u Basu Chakraborty, uwa man u Spokesperson ka BJP Meghalaya State Committee.
Discussion about this post