Shillong:U MLA ka Congress na Mawsynram, u HM Shangpliang da beiñ u ya ka sorkar hapoh ka yung dorbar ynne ka sngi hajrong i leh lyndet yong ka ya ki tre bri wa kiwa sumaar ya ki yingkieñ jri khamtam ya ka Meghalaya Basin Development Authority (MBDA) kawa da thung ya u Sanjiv Shankar na Hyderabad kam utæ u stat dieñ-jri.
Hawa wanrah ya kani ka phang ha ka dorbar hapoh ka Zero Hour Notice, u HM Shangpliang da ong u wa ka MBDA da lyndet ko ya ki tre bri ki tre thaw wa ki chnong kiwa man ki tre wow pynneh wow sumaar ya ki yingkieñ jri, wa da saiñdur da ki warim.
Kini ki yingkieñ jri em ki kamwa 100 tylli ha waroh ka Ri-loom Khasi wa Jaiñtia wa kynthup ha ki san tylli ki Block, ka Amlarem, Pynursla, Laitkroh, Mawsynram wa Shellabholaganj.
U HM Shangpliang da ong u wa ka MBDA da lai lait ko ya ka Deputy Commissioner deiwa lai bait sak cha ki Block Development Block (BDO) wow pynemkaam ya ki wow pyntip cha ki bru wow pynche yei thmu wow pynman Heritage Site ya ki yingkieñ jri deiwa thung ya utæ u stat u wym tip iyi iyi chaphang ki yingkieñ jri wa da leh da ki warim ki tymmen. Ka MBDA da e poisa ko leh 200 chi khlieh wow riñ ya ki bru wow lai cha ki yalang.
Ha iwi i liang da jubab u montri rangbah, u Conrad K Sangma da kam u wa ka MBDA da thung ko ya u stat wow batai wei wow hikai neibhah wa ka sorkar da pynkhreh ko wow pynpsiah ya kini ki yingkieñ jri ha ka UNESCO Heritage Site.
Da ong u wa ka MBDA ym em leh lyndet ko tangwa boi em i duna wei da kular u wow khut lang ya a waroh kiwa em bynta wow emlang.
Discussion about this post