Shillong: Ki Kyrtong wow yakhun neibynta ka chuki Lamphang (Speaker) ha ka yung dorbar Meghalaya Legislative Assembly da thap pyrtuid ki ynne ka sngi. Kini ki kyrtong kynthup ki ya u Metbah Lyngdoh na ka UDP wa kyrchaan lang da ki 40 ngut ki MLA ka Meghalaya Democratic Alliance (MDA) wa u Winnerson D Sangma na ka Congress kawa em du 19 ngut ki MLA ha ka yung dorbar.
Ya u kyrtong ka UDP da synraan lang da u montri rangbah, u Conrad K Sangma ryngkat ki montri wa em ha ka sorkar wa ki MLA ka dhab synrop, katwa ya u kyrtong ka liang pyrchah da synraan da u wa yahkhmat ka liang pyrchah, u Dr. Mukul Sangma ryngkat ki MLA ka party.
Chwa wow thap pyrtuid, u Metbah uwa man u montri ha ka sorkar MDA da ekti u leh ya ka chithi ieh kreh kam u montri sorkar.
Hawa yaklam wa kiwa pathai khubor u Winnerson da ong u wa pdiang sñiawbha u ya i burom wa da e da ki lok MLA ka Congress wow phah ya oo neibynta ka chuki Lamphang. Hawa kylli, da ong u wa hanlada ka MDA boon paaid ko tangwa ka Party u daw yakhun ko wow jop.
Neiliang won u Metbah Lyngdoh da ong u wa chaniah u ya waroh ki MLA wa emlang ha ka sorkar wow e ki ya ka Vote kamwa da yaklam. Da pynrap u leh wym em iwon iwon i chet kylla wei waroh ki MLA ka MDA daw pynjop ki ya oo neibynta ka chuki Lamphang.
Discussion about this post