Uwi na kiwa yahkhmat ka liang pyrchah ha ka sorkar jylla uwa man leh u MLA ka Rangsakona, u Zenith M Sangma ynne da pynbaad u wa ka National People Party (NPP) da kamtre ko wa da wanrah ko yaki tre jylla kiwa neh cha ki jylla waphær waphær ka ri.
U Sangma da ong u wa ha ki Social Media ka Youth Wing yong ka NPP da kamtre ko wa da wanrah ko ya ki tre jylla na baar wei ini da ktah i yei sñiaw kiwa emkti ha kani ka kaam.
Da pynbaad u wa hadien wa em wa jubab pynche yeini ha ki Social Media da chah maham pathan ki.
U Sangma da ong u leh wa ini da pyndooh mynsien ko ya ki wakreh haphrang dooh wow yakhun ya ka klam u COVID-19.
Neiliang u montri rangbah ka jylla, u Conrad Sangma da ong u wa ym em poipyrkhat u wakam kini ki yukylli wa yatoh wa ki saiñ hima kam ha kini ki por wa em ka khlam deiwa pynrap leh wa waroh kiwa en heini man ki kiwa smat wow yarap lada ki seiñbhalang, seiñ hima sima, tangwa man i iwa bakla lada sñiawthooh kamni.
Da pynrap u leh wa ka sorkar yaroh wei pdiang ko ya waroh kiwa smat wow yarap.
U Zenith da boh u leh yei klam u symbood montri rangbah, u Prestone Tynsong uwa ong wa heithaw wow thooh ya kiwa neh cha baar jylla emkaam ya ka Meghalaya Congress wow e yarap poisa ko cha ka Chief Minister Relief Fund.
Hawa jubab won yeini, u Tynsong da ong u wa haka chithi wa da phah da ka Congress cha ka sorkar ym em klam yei pynpoi ya ki nong Meghalaya wa sahkut cha baar jylla, tangwa da pynsñiaw ko yei pynpoi yung ya kitu kiwa sahkut ha Meghalaya kiwa toh na kiwi ki jylla.
Discussion about this post