U President ka People’s Democratic Front (PDF), u Banteidor Lyngdoh da ong u wa i mih wa i psiah ki dkhot ha ki seiñ saiñpyrthai da embait neibynta wow yakhun ya ka Election. Ini i ong uwa yahkhmat ka PDF toh hajrong i mih khubor wa i klam wa em ki MLA/MDC kiwa thmu wow mih noh na ka PDF wow yakhun ya ka Election ha u snem 2023 na kiwi ki Party.
Da ong u wa i klam da em bait ha kawon kawon ka Party, wa em ki na ka NPP, UDP wa Congress kiwa mut wow mih wow yakhun noh na kiwi ki Party, wei ini u jia bait ki ha i kaam saiñhima, wei pynrap u wa kitæ waroh daw ya pait manda poi i por uyi wa psiah wa uyi wow mih.
Da ong u wa ha ka saiñhima sima da em bait kiwa psiah wa mih, wot ha ka NPP kawa boon tam katni ki MLA kiwa em wa psiah bar kiwa mih.
U Banteidor uwa man leh u Montri hapoh ka sorkar Meghalaya Democratic Alliance (MDA), da ong u wa ka Party ym em kreh ko du neibynta ka Election, tangwa ha kini ki 4 snem da kreh neibynta i myntoi ki paidbah. Da ong u wa kam ka Party hawa em iwon iwon ki phang wa ktah ya ki paidbah, ya i jooh da klam bait hapoh ka sorkar, khamtam ya u Montri Rangbah neibynta i bha i biang kiwa chong chnong ka jylla.
Hajrong i pynsñiaw yong ka Hill State People’s Democratic Party (HSPDP) wow em i yatylli yong ki seiñ ri-loom neibynta ka Election 2023, u Banteidor da ong u wa ka PDF toh kawa sñiawbiang bha wow em i yatylli, tangwa da pynrap deiwa ong wow yatylli won du ha i por Election ym man iwa toh. Da ong u wa lada kwah yei yatylli toh u man hajrong ki phang kiwa ktah ya ka jylla wa ka jaitbru.
U Banteidor da ong u wa ki seiñ ri-loom kiwa em ki jooh ki phang wa ki jooh ki thmu wow leh ya iwa bha tam, la man ha ka UDP næ HSPDP, neibhah ki seiñ ri-loom toh kiwa neibynta wow yada ya ki tre tre chnong wei wow pynneh ya ki riti dustur wei yei mantre ym toh u dooh noh.
Da ong u wa katni wa man iwa emkaam wow wanrah yei sñiawthooh yumut neibhah lada dang em ha ka luti wow yatan wei kynthah uwi ya uwi ym poi cheiwon cheiwon leh.
