U Montri wa pait ya ka puræ puthi ha ka jylla, u Lahkmen Rymbui da ong u wa ki khynnah emkaam ki yei chah sikai ha ki kamra skur, tangwa da pynsñiaw u leh yei sñiawdiaw wa duna ki khynnah skur kiwa da palat 15 snem i rta wa wan chim tika yada COVID-19.
Da ong u wa ki khynnah emkaam ki yei nang i stat wei ya ki skur toh u wai bait, wei pynsñiaw u wa la ar snem kattu da imlang wa u khñiang khlam, wei ym ye wow lai chakhmat deiwa pynkhreh ya ki khynnah wow yoh yei stat deiwa chah man broo ha i chah kdoh ha u Covid.
Da pyntip u leh wa ka chnat puræ puthi da pynmih ko yei pynbna wow wai noh ya ki skur ha ki thaw wa em cha palatsor nadooh Class I hadooh ki Class XII, katwa ha Shillong wa khapsor da phah wow sdang biang chwa da ki Online Class.
U Rymbui da ong u wa ka chnat daw bichaar bniah ko yei long i man na-i-por cha-i-por, wei daw pynbna lada em i pynkylla, heiwa da pyntip u leh wa da pynkup bor ha kiwa pait ya ki District wa kamjooh ya ki bor pynlai skur wei da pynrap u wa ya waroh ki jaitkaam da sdang lut, ileh wym ye u sdang ya ki skur.
