Ynne ka sngi ki MLA ka ri-loom Jaiñtia kiwa kynthup ya u Sniawbhalang Dhar, u Comingone Ymbon, u Lahkmen Rymbui, u Kyrmen Shylla, u Shitlang Pale wa u Wailadmiki Shylla da wan booddien ki yei pynkhreh ki bor ka East Jaiñtia wa ka West Jaiñtia hei wow yakhun pyrchah ya ka khlam u COVID-19.
Ha West Jaiñtia Hills da pynman ya ka yalang ha Conference Room ka yung krehkaam u Deputy Commissioner heiwa da em ki khlieh ka District kam u DC, u SP, ki Doctor na ka chnat i chait i khiah wa kiwi kiwi.
Hadien wa kut ka yalang, hawa yaklam wa kiwa pathai khubor u Lahkmen Rymbui uwa man leh u montri ki kaam pohyung sorkar jylla da pyntip u wa kani ka yalang toh wow booddien yeiwa da leh wei kammon da pynkhreh ki ar District lada jia wa wan psiah uni u khñiang chapoh kini ki District.
Da pyntip u wa da pynkhreh ya ki Isolation Ward ha pyn ar tylli ki District heiwa du ha West Jaintia Hills da pynkhreh ha Civil Hospital, ha Dr. Noman Tunnel Hospital, wa ki CHC wei lada jia wa emkaam daw booh leh ha Children and Maternity Hospital, Jowai.
Chooh chooh da pyntip u wa ki tiar wa duna kam ki Personal Protective Equipment (PPE), ka Ventilator wa kiwi daw chimkhia wow pyntip ya ka sorkar wow pynpoi smat ya ki.
Da ong u leh wa ha ki thaw wow psiah chapoh jylla ha East Jaiñtia Hills ki tiar wow sylli namo ki Testing Kits em ki le tylli tangwa smat lut Battery ki wei dang emkaam chooh ya ki katwa ha West Jaiñtia won ha Saphai wa Namdong ym em kini ki tiar wow sylli wei yeini leh daw phah noh khnang wow yoh u sylli ya kiwa wan psiah chapoh ka jylla.
Da pyntip u wa da em 608 ngut ki khynnah kiwa wan na baar jylla kiwa da pyntip cha ka 108 wa kiwa da pyntip pyn daki hi wei kini katkam wa man kattæ da kyntu ya ki wow chong bait ki ha yung namo kawa tip leh kam ka Home Isolation.
Heiyatoh wa ki mar baam, u Lahkmen da pyntip u wa ki mar baam man ki kiwa dap hapoh District wei ym em iwon iwon itæ i duna kini ki mar wei ki paidbah ym toh u tieñ ki.
Discussion about this post