Ynne ka sngi da pynman ya ka yalang wa chongknor da u montri rangbah ka jylla u Conrad K Sangma, chirrup wa u montri ka chnat bordiñ, u James K Sangma wow yaklam hajrong i pyndooh bordiñ (Load Shedding) wa syndet ka MeECL ha ka jylla.
Neiliang u James K Sangma da pyntip u wa da leh yeini neidaw wa em i wit wa i wym biang ha ka chithi kular wow su namo ka Letter of Credit ya ka National Thermal Power Corporation (NTPC) iwa da pynbor ya ka MeECL wow pyndooh bordiñ.
U James da ong u wa da yakam yillu hajrong ini wei daw yaklam u leh hajrong ini i kaam wa u montri ka sorkar pyrdi hajrong i eh i khoo wa yachem ka jylla khamtam heiyatoh wa ka bordiñ wow pyntikna wa daw ye u pyndam noh ya ki kyndon pynduna bordiñ ka NTPC deiwa smat dooh.
Ha kani ka yalang da embynta kiwi ki montri ka sorkar jylla wa u Chief Secretary, u M S Rao wa ki sahep ka chnat Power Department.
