Kawi ka kari Alto 800 kawa kamai Tourist kawa em Number ML-11-2237 ynne i janmiet heipor kamwa 6:00 waje da noh ko dei khmut cha khap yung ki bru wa em ha u sarok wa lai nadien ka yung krehkaam u DC ha Jowai.
Katkam wa yoo kiwa sakhi, da ong wa kani ka kari toh kawa wan neiliang nan kasari wei da pynhær bha ko hawa pynnoh ya uni u riat wei da tyrrah ko leh ya kawi ka kari Alto wa em hakhmat kawa da skid charood katwa kani ka kari kamai won da tyrrah ko ya ka Gate wa i kynroh wei da noh ko dei khmut ha khap iwi i yung.
Hapoh kani ka kari da em du uwa yah donhi uwa da ye u mih dei bor yong oo hi wei da mynsoo u malu mala.
Katkam wa khana ki pulit wa em ha kani ka thaw, da suba wa sih u Brake kani ka kari tæ jia ini tangwa kattæ leh ka takit dang lai ko chakhmat.
Kiwa em yung hajan kani ka thaw wa dong bha uni u sarok, da ong ki wa ini toh i sien wa soo wa em ki kari wa wan tyrrah ya ki chrot bordiñ wa i chram wa em ha kani ka thaw wei i sien nyngkong won wa da jia kamni.
Da kyrpaad ki ya ka chnat PWD wa toh u booh Speed Breaker ha kani ka thaw yow lait ware ki kari u pynhær kamjooh wow kær kynroh yow lait ki yung wa em ha kani ka thaw nei maa.
Da ong ki leh wa lada kani ka kari ym em tyrrah ko ya ka kari wa em hakhmat ko, da hær bait ko chajrong i yung wa em ha kani ka thaw wa jia.
Ya kani ka kari da wan taan wei wan kit ka da ka Truck khwe.
Discussion about this post