15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Cha u Hek lai pynkynmoo u MDC ka Mynsngad wow pynku kyrdan yaka Namdong PHC

Advertisement ad1
Advertisement ad1
Advertisement ad1

Jowai: U MDC ka Mynsngad Constituency West Jaiñtia Hills District, u Dawan Lyngdoh ynne ka sngi da lai yachem u wa u montri i chait i khiah u A.L. Hek yow pynkynmoo heiyatoh wow pynbiang yei duna ka Namdong PHC nalor i dawa wow pynku kyrdan cha ka CHC.

Haka chithi wada e kti cha u montri i chait i khiah, da ong u wa lyngba i sur yong kiwa yahkhmat yaki chong ki thaw kamjooh ki paidbah wa haap hapoh ka Namdong PHC da lai booh u yei kyrpaad neibhah waki paidbah ka thaaiñ kiwa hap u chaniah na kani ka PHC maad ki yei eh i khoo neipor cheipor khamtam hei kjut chitom i kha i pun neidaw wym ye kani ka thaw sumaar yei chakri.

Da kdaw yaki daw wym ye ko u e chakri toh wa duna ki wakreh wa kynthup nadooh ki Doctor, ki Nurse, Chowkidar, kiwa yah kari wa LDA. Kamwa man kattæ em du uwi u Doctor uwa hap pait waroh 24 kynta, tangwa neidaw wa hap u wow yabeh yaki kaam yong ka PHC da hap u wow mih kamtæ em u du le soo sngi haka chi tayaw.

Neidaw wym biang Doctor, kiwa rap em laad lai ki cha ki thaw sumaar wa em cha Jowai cha Shillong tangwa kiwa dooh won hap ki u chim dawai naki Kabiraj wei hajrong ini da dawa wow booh sa uwi u Doctor ha kani ka PHC.

Hanla kani ka PHC em ko ya 5 ngut ki Nurse tangwa ym ye ki wow yarap yaki paidbah waroh chi tayaw lym em Doctor, neitæ ki Chowkidar em ki sa arngut neibhah uwi da kyrriah cha Jowai.

Heiyatoh wa uwa yah kari da kyntu wow booh sa uwi khnang yow ye ki u e chakri waroh 24 kynta wei u thung bru leh haka kaam LDA kawa da thylli, nalor wow pynbiang leh yaka Ambulance neidaw kawa rim wym em de krehkaam ko.

Heijooh i por da kyrpaad wow chna pynmiat ya u sarok cha katai ka PHC nalor wow kreh pyndep ya waroh ki kreh wa dang sahteiñ.

Da ong wa kani ka PHC hap ko u pait ya 35 tylli ki chnong yong katai ka thaaiñ wei em ko yei boon bru kamwa 30,152 ngut.

Kamtæ da dawa leh wow pynku kyrdan noh ya kani ka PHC cha ka CHC wei kamjooh u pynbiang yei emkaam yong ki Sub-Centre kam ka bordiñ, ka um, i thaw thiah waki thaw thang yaki tiar wa da dep pynemkaam.

Kam wow pynkynmoo heiyatoh wa i dawa u pynku kyrdan yaka Namdong PHC cha ka CHC, neiliang ka Dorbar Raij Namdong 12 Chnong leh nadooh u snem 2017 da dep thoh ko cha ka Roshan Warjri heipor wa dang ksoh ko kam ka montri yong i chait i khiah.

“Neiliang u montri A.L. Hek da kular u wow pynku noh yaka PHC cha ka CHC neibhah wa ka poisa dang em ko katni wei kamjooh u pynbiang yei emkaam ha ki Sub-Centre,” ong u Dawan Lyngdoh hawa yaklam wa u Wyrta.

Share this:
Previous

U pteiñ biang i krehkaam ka Section 144 ha West Jaiñtia nadooh ka 5 tarik

Next

Ki 6 ngut wa dang yoh COVID-19 ha West Jaiñtia toh kiwa wan na baar jylla wei em ki ha Quarantine