Shillong : Kiwa kreh ka Raj Bhavan, Shillong da ujor pyrchah ki ya u lat ka jylla u V. Shanmuganathan ha ka chithi wa da thoh ki cha u Prime Minister ka ri u Narendra Modi.
Ha ka ujor da ong ki wa u lat da pynhiar dor u ya ka Raj Bhavan deiwa pynkylla u ya ka cha ka thaw sah thaw lai ke ki kynthai khyllood “Young Ladies Club”.
Da ong ki leh wa oo man u u bru wa khlan u thok deiwa khana ki wa i kaam yong oo wa emlang u ha chrooh u president wa rim ka ri u APJ Abdul Kalam toh iwa thok neibhah oo dang thiah u heipor wa poi phone u na u Prime Minister wa phah ya oo yow lai u cha Bethany Hospital, Shillong.
Da kyrriah kreh u leh ya u Principal Secretary yong oo hadien wa pyrchah u yei wa boon wa leh u. Hadien wa kyrriah u oo da pynkylla u ya ka kamra VVIP Dining Room cha ka ophis wei da pynchong u da u Secretary wa thymme ha ka tai ka kamra wei da pynkylla lut u ya kiwa kreh heiwa da booh du ki kynthai wa dang khyllood wow kreh wa oo. Ya u Private Secretary yong oo u chynrang leh da kyrriah kaam u oo.
Ha ka ujor da ong leh wa jooh dai sarom u ya kiwa boon kiwa kreh wei da pynchitom u yei pyrkhat pyrdaiñ yong ki hadooh wa u Deputy Secretary yoh u da ka Brain Stroke heipor wa dang kreh u hadooh wa booh ya oo ha ICU ha Woodland Hospital wei da khlaad u ha ka 3 Khonchonglad 2016.
Chi sngi hadien wa yoh stroke u Deputy Secretary u lat da pynman u da ka baam ja sñiawbha heiwa chiteiñ na kiwa kreh ym em wan ki neidaw wa sñiawsih yeiwa da dep jia.
Neidaw wa ym jooh wan kreh u Secretary u Governor wei ym em leh u Deputy Secretary, ki ADC yong u Governor da leh ki katwa ngait heiwa ki kynthai khyllood da psiah da mih ki katwa ngait ki wei da yoh ki leh u psiah cha i kamra thiah yong u lat.
Ki kynthai wa da thung kreh u toh ka Bhanumati na Chennai da thung u ya ka kam ka Personal Cook, ka Chinmoyee Deka na Jorhat, Assam da thung ya ka kam ka Personal Assistant wei hadien da e ya ka da i kaam PRO.
Kini ki ar ngut leh da yoh thaw sah mynkna ki, i baam mynkna, ki kari wei da sah ki leh ha Raj Bhavan.
Kiwa em yatoh hadooh ki lok ka Chinmoyee leh da yoh ki ya kini ki jooh wei wan ki man lei por cha Raj Bhavan.
Ka Chinmoyee toh kawa lai lang bait wa u lat kat cha wa lai u lait noh manda lai u lat cha chnong u cha Chennai. Kam ka PRO yong oo ym em ophis ko wei da kreh ko na i kamra thiah yong ka wa tip pyruid kam i “Rilang” wei ka leh wa pait ko ya waroh ki Social Media Account yong oo kam ka Facebook wa kiwi kiwi. Ini i kamra toh iwa ya bi ka wa kamra thiah u lat wei heipor wa man u kam u In-charge Governor ka jylla Manipur ka Chinmoyee jooh sah lang ko wa oo ha i jooh i kamra ha ka Raj Bhavan, Imphal.
Ha Raj Bhavan, Shillong da em ki u wi u Doctor wa ar ngut kiwa yarap ya oo, tangwa da thung sa ka wi ka nurse ka wow em hei sngi wei da thung u leh sa ka wi ka nurse ka wow em dei miet, wei da em leh ka wi ka nurse wa da yut kawa kam wa u lat da pyrchang u wow leh khlem akor wa ka.
Ha ka 07.11.2016, 10 ngut ki kynthai da wan ki wow yaleh yei kaam PRO, ha ka interview da sñiawphylla ki u yoo wa waroh toh ki kynthai donhi hadien wa kylli ki chaphang ini ha ka sngi wa bood da wan 5 ngut ki chynrang wow yaleh yeini i kaam wei da jied ya arngut ki chynrang wow wan biang u yaleh interview iwa leh kyndeh don hi da kynnoh kiwa kreh ka Raj Bhavan.
Discussion about this post