Heiyatoh wa i yap ki 5 ngut hapoh kawi ka thlu um wa em ha Lapalang Dong Madan (Lane 4), Shillong heiwa ar ngut na ki toh kiwa chi payu kiwa da hiar yow lai pynlait ya ki le ngut kiwa em hapoh, da booh ya ka FIR pyrchah ya u tre yung wa u Contractor neidaw wym em chimkhia ki yei kaam.
Kam wow pynkynmoo wa hei miet ka 10 tarik heipor kamwa 7:30, da em ki bru wa kreh ha iwi i yung bru hapoh ka thlu um kawa yillu kamwa 33 ft heiwa da pynsiah ki da ka Pump Diesel yow taan ya ka um napoh kani ka thlu um tangwa i tdem wa pynmih kani ka Pump kawa man da ka Carbon Monoxide da pynyap ko ya ki le ngut kiwa da em chwa hapoh heiwa uwi da ye u wow mih wei uwi won uwa em da ha lait da lai paan yarap u.
Heini i por da wan u Umesh Thakuri (30 snem) wa u Sunil Thakuri (34 snem) kiwa chi payu kiwa sah pyn chajan heiwa da hiar nyngkong u Sunil uwa chem ya iwi i metyap wei da khut u ya u Umesh yow wan yarap u heiwa da kbai u yei pyrtuid u le sien.
Manda hiar u Umesh da sñiaw wa kbai u yei pyrtuid u Sunil le sien wei hadien ini da suki lut ym em de sñiaw ki bru iyi iyi kiwa da emlang heini i thaw kiwa da wan wow yarap.
Hadien wa suba wa da em iwa jia wa rap maa, da lai pyntip cha ki pulit ka Rynjah Police Station tangwa ki ym ye ki wow yarap neidaw wym em ki ya ki tiar ki tar wei da wan noh da ki bru ka SRT wa SDRF.
Kat u sai ki, u Umesh da khlaad u hadien kattu katni minit wa sai oo katwa u Sunil yap u chwa wow poi cha NEIGRIHMS.
U Sunil toh uwa da yap kurim, wei da ieh u chadien ya 2 ngut ki khon, ka bei wa u pa kiwa da heh rta wei man u leh uwa khih yow pyndap ya ki deilang u diah u, u Umesh wei sah ki ha Nongrah Dongktieh, Block-5, Shillong.
Kiwa kreh hapoh kani ka thlu um kiwa yap toh u Pynskemlang Mawthoh (22 snem), u Rapborlang Nongspung (35 snem) kiwa na Thangsning, Smit wa u Elka Shadap (25 snem) uwa na Umiew Maw-U-Sam, Smit.
U SP ka East Khasi Hills da pyntip u wa da Register ya ka Case ha Rynjah Police Station wei da pynngat hapoh ka Section 123(2) ka Disaster Management Act, 2005.
Discussion about this post