Ki pulit ka Vietnam ynne da kem ki ya u Captain ka Speedboat kawa da kylla ha duriaw heiwa da yap 15 ngut ki Tourist kiwa na India.
Kani ka Speedboat kawa kit ya 32 ngut kiwa na India wa soo ngut ki nong Vietnam kiwa pynlai ya kani ka lieñ heiwa da kylla ko kamwa chiteiñ kilometre na rood duriaw ynnin ka sngi heipor wa mih ko na Hon May Rut Ngoai Island iwa em hajan ka Phu Quoc Island.
Uni u Captain wa chah kem toh uwa tip kam u Nguyen Hong Hai (57 snem), wei da chah takit deiwa suba wym em bood u ya ki kyndon hawa em kiwa chong lieñ.
Ki 16 ngut kiwa lait im da yoh ki wow mih napoh Hospital wei da pynkhreh ki wow liwan cha India wei em won uwi uwa dang cha sumaar ha kawi ka Hospital ha Vietnam.
Ya ki metyap da kit cha Ho Chi Minh City chwa wow kit ki cha India.
Ki 15 ngut kiwa yap da lai ki cha Vietnam deiwa pynkhreh ka Lava International kawa man kam ka Company wa chna Smartphone wa kiwi ki jiat mar Electronics wei kini kiwa lai cha Vietnam toh kiwa krehlang, em kiwa man kam kiwa khayi ka Lava wa kiwa dai ya ki mar yong ki.
U Ashish Kumar (48 snem) uwa man kam u Distributor kani ka Company da ong u wa neidaw wa boon ki da yabhah ki ha ki le tylli ki lieñ yow lai na ka Hon May Rut Ngoai cha Phu Quoc Island heipor wa jia ini.
Kawi ka lieñ da lai chwa ko wei da kylla ko katwa kiwi ki ar tylli ki lieñ dang sangeh ki ha rood duriaw heipor wa jia ini.
I thaw wa kylla kani ka lieñ toh iwa jan bha charood duriaw wei kiwi ki lieñ da lai ki wut-wut wow yarap tangwa da chem chitom ki neidaw wa joor khih ka duriaw.
Uwi na kiwa sakhi ya ini wa jia uwa em ha kawi ka lieñ wa em pyn hajan, da ong u wa da yoo ya ki bru wa ksoh ya kani ka lieñ wa kylla, wei ki wym em sap Life Jacket da kyrthai ki katwa ye ki hapoh ka um.
Wei oo leh ym ye u wow poi chajan ki neidaw wa joor chah kyntiñ ka lieñ ha ka duriaw wei lada lai ware chajan ye u toh kiwa em hapoh um ki Propeller ka lieñ. Kamtæ da kawang ki da ki Life Buoys kiwa da kdohlang wa ki tylle yow taan ya ki bru chapoh ka lieñ ki.
Kiwa ye bha u yarap toh kiwa pynekaam da ki Jet Ski kiwa ye wow kit ya kiwa lait im cha rood duriaw uwi hadien uwi.
Katkam ki khubor wa mih, u Captain kani ka Speedboat da phah u ya waroh wow sap Life Jacket ki chwa wow mih tangwa kiwa boon da ksoh ki ha kti wei manda kylla kani ka lieñ boon sahkut ki hapoh ka lieñ.
Uwi na kiwa sakhi won da ong u wa manda wanrah ya kini ki bru cha rood duriaw ym em ki bru wa toh u e sumaar jhan (Emergency Medical Care) wow e yarap wei kiwa yarap toh da ki para Tourist deilang ki bru paidbah kiwa da leh CPR wei e Oxygen.
Ki 17 ngut kiwa mynsoo da kit ki cha Phu Quoc Sun Hospital hadien wa poi ki Doctor wa ki Nurse cha ini i thaw wa jia.
Na kiwa yap, 10 ngut toh kiwa na Tamil Nadu, 3 ngut na Andhra Pradesh wa 2 ngut na Kerala.
Ki bru na India kiwa lai cha Vietnam da boon bha ki katni heiwa ha u snem 2025 da em ki 7,50,000 ngut iwa da ku da 50% na u snem wa dadep.
Discussion about this post