Ka Ayesha Yusuf Hazarika kawa man ka khon kiwa na North Lakhimpur, Assam da man ko kam kawa nyngkong dooh kawa man kam ka Assamese wow chah jied yow man kam ka dkhot ka House of Lord hapoh ka UK Parliament.
Da ini da yoh ko yei kyrdan deiwa tip noh ya ka kam ka Baroness Hazarika of Coatbridge wei da chim ko yei thaw yong ka hapoh ka House of Lords haka 9 tarik uni u bnai ha Westminster, London.
Ka Ayesha toh kawa joh man kam ka Stand-Up Comedian da jooh man ko leh kam kawa e buit ya u Prime Minister ka UK, u Gordan Brown.
Ka Ayesha toh ka khon u Dr. Liyaqat Ali Hazarika uwa na North Lakhimpur uwa da lai sah noh cha Glasgow, Scotland ha ki snem 1960 wei u papun ko toh u Yusf Ali hazarika uwa man kam u muktiar kamjooh u Chiarman ka North Lakhimpur Municipality Board.
Ya ka Ayesha da kha ha Bellshill, Scotland ha u snem 1974 wei da heh da san ko ha Coatbridge. Da kreh ko kam kawa klam Radio waka Times Radio, da jooh mih TV ko leh ha ka BBC, Sky News, CNN wa kiwi kiwi de.
Da dep ko leh wow thoh kot wei ka kot wa nyngkong wa toh ko toh kawa tip kam ka ‘Punch and Judy Politics-an insider’s guide to Prime Minister’s Questions’ kawa da pynmih ha u Nasisan 2018.
Hadien wa da chah jied ko yow man ka dkhot ka House of Lords da ong ko wa sñiaw sarong ko wow yoh yeini i kyrdan kam ka khon ki Muslim kiwa na India kiwa da kreh chitom yow pynheh pynsan ka.
Discussion about this post