Uwi u chipai ka Border Security Force (BSF) uwa man kam u Constable, u Purnab Kumar Shaw da chah kem u ha ki Ranger ka Pakistan ha ka 23 tarik hadien wa kaap bakla ya u Zero Line ha ka Ferozepur Sector.
Yeini wa da jia da tip ha ka sngi wa bood hapyrdi joor bha i chong syier ha khappood ka India wa Pakistan na iwa jia ha Pahalgam heiwa da em 26 ngut kiwa uiñke suwari kiwa da cha siatyap.
Yow pynlait ya uni, da pynman ar sien ki yachemlang wa tip kam ki Flag Meeting kawi ha ka 23 tarik wa kawi won ha ka 24 tarik heipor 2:00 waje i sngi yow dawa pynlait wei pynuiñ ya u Shaw uwa man kam u dkhot ka 24th Battalion wei uwa chong wa sah ha West Bengal.
U Shaw toh uwa dang e yada ya ki warep kiwa dang ah ya ki maar rep ki ha i thaw wa tip kam i Cobra Fence wa em ha Mamdot Block heiwa da toh kaap bakla u ya u pood deiwa rahlang ya ka suloi G2 Rifle, le tylli ki tadong booh kuli wa em 60 tylli ki kulit wym pu em siat.
Ya u Shaw da booh ha kani ka thaw nadooh ka 10 tarik uni u bnai.
Wot hadien wa da yachem la ar sien, neiliang ki bru ka Pakistan ym pu bien ki wow e dei jubab wa biang deiwa ong wa hap ki wow yaklam wa ki bor wa em haneiñ wei ym khana leh yei daw wym pynlait ki ya u Shaw. Wei ha ka Flag Meeting wa toh u pynman heipor 11:00 waje i step ka 24 tarik ym tang u wan ki Ranger ka Pakistan wei da won ki toh ha ka Flag Meeting wa bood heipor 2:00 waje i sngi wei da ong donhi ki wa hap ki wow yaklam wa ki bor wa em haneiñ.
Hadien ini won ym bien de kiwa na Pakistan wow ong deiwa che mynnu bien biang ki u yachem deiwa pynman da ka Flag Meeting.
Neiliang ki heh ka India da ong ki wa neidaw u Shaw toh uwa dang booh thymme ha kani ka thaw, kamtæ ym tip bha u chaphang kani ka thaw hadooh wa jia ini.
Discussion about this post