Ki pulit ka East Garo Hills da yoh ki wow kem ya uwi u nong Nigeria wa kawi ka kynthai Naga na Delhi heiwa kini ki arngut toh kiwa emkti wow thok wow chukor ya ki bru lyngba ka Internet wa tip kam ka Cyber Crime.
Ya ini wa jia da e FIR ha ki pulit ka Williamnagar Police Station ini wa dep heiwa da em wa chah thok T. 2 lak.
U nong Nigeria toh uwa da tip pyrtuid kam u Felix wei da pyntikna wa emkti u wow chukor bru da ki pulit ka East Garo Hills Police wei manda lai kynreh yei thaw sah u wa em ha Tilak Tilaknagar, Delhi deiwa yoh yarap na ki pulit ka Delhi, ynne ka sngi da kem ya u Felix wa kawi ka kynthai Naga.
Na kini da yoh wow kem ya 11 tylli ki Mobile Phone wa 18 tylli ki ATM Card. Da suba leh wa kini toh kiwa emkti ha kiwa boon ki kaam pyrchah aiñ ha kiwi ki jylla waka District leh kamjooh.
Ya kini ki arngut daw wanrah cha Williamnagar yow takit chooh chooh.
