Uwi u bru wa 23 snem i rta da chah kem u ha Aizawl, Mizoram ynnin ka sngi Bibar deiwa chah pynbaad tooh poisa u ha i thaw kreh u ha kawi ka Petrol Pump deiwa pynkylla ya u QR Code wa pynemkaam ki bru yow su poisa.
Ini da jia ha ka Mizofed Petrol Pump wa em ha Treasury Square.
U Manager kani ka Petrol Pump da ujor u ha ki pulit hadien wa suba u wa em wa pynkylla ya u QR Code heipor kamwa 3:00 waje ynnin ka sngi.
Hawa wan takit ki pulit, da kem ki ya uni uwa kreh ha kani ka Petrol Pump wa tip kam u H. Lalrohlua uwa sah ha Aizawl hi wei hadien wa takit ki pulit da phla u wa leh u yeini i kaam wei da chem leh wa uni u bru ym jooh leh u iwon iwon i kaam pyrchah aiñ nachwa.
Katkam wa phla uni u bru, da Print u ya u QR Code ka Google Pay yong oo wei da biah u ya uni hajrong yong u QR Code kani ka Petrol Pump.
Ha ini i por wa chibet donhi wa su ki bru le sien wow thap phñiang, da yoh u Rs. 2,315 wei da pynuiñ u Rs. 890 cha uwi uwa thap phñiang katwa ka Rs. 1,425 da pynlut u ka.
Ini rukom leh kamni ymtoh iwa thymme wei da tip ki leh kam i “Quishing” heiwa ki bru wa chim kabu da kylliang ki ya ki QR Code deiwa biah dei yong ki wei em ki por leh man ki kam ki Link cha ki Website wa thok chukor ya ki bru.
Discussion about this post