Chah kem uwi uwa kylli yei niam kiwa lai cha Pahalgam

Hadien wa chah siatyap ki 26 ngut ha Pahalgam ha ki damok kieñ suloi ha ka 22 tarik uni u bnai, neiliang ki pulit ka Ganderbal District ynnin ka sngi da kem ki ya uwi u bru deiwa suba ya oo hadien wa poor iwi i Video ha ki rynsan Social Media heiwa da pynoo wa kylli u ya kawi kawa uiñke suwari yei niam yong ka.

Ki pulit mar ya tip yeini da lai kem ki ya uni u bru wa tip kam u Aiyaz Ahmad Jungal uwa chong chnong ka Gohipora Riazan, Ganderbal wei da kreh u kam u tre kule yow kit ya kiwa uiñke suwari ha Thajwas Glacier, Sonamarg.

Ki pulit da kylli takit ki ya uni u bru yow tip lada emkti u wa iwa jia ha Pahalgam wei da pynngat ya oo leh hapoh ki kyndon aiñ.

Kani kawa uiñke suwari kawa tip kam ka Ekta Tiwari kawa na Jaunpur, Uttar Pradesh da kam ko wa da yaklam ko wa uni u bru ha ka jooh ka sngi wa jia wei da emlang wa uwi u bru kiwa tyrwa kule yow lai cha Pahalgam.

Related posts

Kiwa yaleh yow lai puræ MBBS wa BDS hapoh ka Central Pool Quota ye ki u thap pyrtuid lyngba ka Google Form

July 27, 2025

Booh ka KHADC da ka Recruitment Committee wa laitlooid yow khooid i rukom thung kreh

July 27, 2025

Ka Ekta da pynyoo ko ya i dur uni u bru wa chon ko da ka Phone ko deiwa kam ko wa uni toh uwi na kiwa suba wa emkti heiwa da kylli u na ka yei niam ko tangwa ym em tip pyrtuid ko oo.

Da ong ko wa yei dur u da yoh ko wow chon ha Baisaran Valley wei hadien wa pynmih ki pulit yei dur wa dro (Sketch) yong kini ki bru wa suba wa emkti da kynmoo ko ya uni u bru.

Da khana ko leh wa heipor wa chong kule, uni u bru da kylli u yei pyrtuid ko, i niam ko wei lada kwah ko wow lai cha Ajmer Dargah næ cha Amarnath wei da ong u wa ye ki wow yarap ya ka khlem da hap wow Register chwa.

Uni u bru da pteiñ u leh wow kylli lada sñiawsuk ko ya ka niam Hindu næ Islam heiwa da jubab ko waroh toh kiwa biang wei da kylli won u katwon ngut ki lok Hindu wa Muslim em ko wei lada jooh puræ ko ya ka Quran heiwa da jubab ko wym jooh em neibhah wym tip Urdu ko wei da jubab u wa ya ka Quran da thoh ya ka hei ktien Hindi leh. Wei ha ini i por da sdang ko wow tieñ.

Hadien won da sñiaw ko wa klam Phone u wa wym em krehkaam ka ‘Plan A wei hap leh Plan B wei da phah 35 tylli ki suloi deiwa booh ki ha phlang’.

Da khana ko cha ki pulit wa uni u bru da klam Phone u rap slem wei i dur u toh kam ki Pakistani kiwa im ha Kashmir wei da kam u toh uwa sikai Quran wei da kreh u ha kani ka thaw la kamwa 7 snem.

Yei daw wym em lai pyntip ko yeini cha ki Tourist Booth, da ong ko wym em yoo ko kawi leh kam katæ wei da em du kawi ka Check Point hei bynta wa 7-8 Km chwa u poi cha Pahalgam tangwa ym pulit ha kani ka Check Point.