Chah kynthær u PN Syiem ha ki MDC ka UDP ha ka yalap Election ha Ranikor

Shillong: Ka yalap Election neibynta ka Election chiteiñ samoi ha Ranikor Constituency da sdang ko wow chit neibhah hadooh ki Party kiwa da ya krehlang ha ka sorkar MDA katni da sdang ki wow kynthah mar kylliang khamtam dooh yei ieh kaam u MLA warim u Martin M Danggo du hadien kattu katni bnai hadien wa jop u ya ka Election 2018.

Hawa klam ha ka yalang yalap Election ka UDP kawa da man ha Umdohlun ha ka 14 tarik uni u bnai, u MDC ka Umsning u Donkupar Sumer da ong u wa i iehkaam u Martin M Danggo kam u MLA na ka Party Congress ymtoh neibynta ki paidbah wa dooh wa duk yong ka Constituency tangwa neidaw ki heh spah kiwa em wa oo kiwa da sdang stang ka muna poisa ki neidaw wa chong ki ha ka liang pyrchah.

U Donkupar Sumer da ong u, “Ka Congress katni ym em de ko hei bor iwa pynman ya u Danggo wow ieh u yei kaam MLA wow psiah cha ka Party NPP kawa em hei bor synchaar wei da leh u ya ini du neibynta ki heh spah kiwa kyrchaan ya oo, ymtoh neibynta ki paidbah yong ka Ranikor Constituency.”

Neiliang u Donkupar da syllaad u leh ya u Danggo ya iwa ieh sah chrah u ya ka Ranikor wot hadien wa da jop u na kani ka Constituency la kamwa 20 snem neibhah kam i long i man hapoh kani ka Constituency ym em ki dak ki chin wa wanrah ya ki kaam pynroi khamtam heiyatoh wa i chait i khiah.

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

Yei wan psiah khlieh yong u PN Syiem wow yakhun ya kani ka Election chiteiñ samoi ha Ranikor hadien wa chah pynrem u ha u HM Shangpliang na Mawsynram, neiliang u Donkupar da ong u, “ U PN Syiem tang u sdang leh ympu em sdang bha da thok da chukor u ya phi ki paidbah yong kani ka thaaiñ Wahkaji wei i e i yong oo ya ka sarok toh kawa dadep dei baam-tooh ymtoh neibynta i yoh myntoi yong ki paidbah kani ka thaaiñ”.

“I kaam ym yahap wa ka poisa kawa da dep wow sai ya kawa da mang wow pynkreh ya kani ka sarok nadooh na Myriem chadooh Umdohlun-Wahkaji-Phlangdilon wa chadooh cha Wahkaji ya kawa da bhah hadooh T. 5.80 klur katwa ka poisa wa da dep sai da man ko T.4.6 klur” ong u Donkupar, wei da pynrap u leh wa ki paidbah ymtoh u chah pynbiej hei pnah u thylliej neibhah i wan yong u PN Syiem wow yakhun ya kani ka Election chiteiñ samoi ha Ranikor man ko thij kam u dakha mukur wow pynjngut ya ka nan ha Ranikor wei kamjooh leh wow khanglaad ya u Pius Marwein uwa em katni ha ka thong wa hakhmat dooh wow yoh yei jop ha kani ka Election.”

Hajrong i kamtre yong u PN Syiem wa toh wa oo uwa leh wow pynwiar yei eh ki Rangbah Shnong khamtam hajrong ka Village Administration Bill (VAB) neiliang yong u Sumer da ong u hei yong sakhiat u Antonio uwa leh ya kani ka kaam nadong chadong neibhah man u kam u Chairman yong ka Committee kawa pynbiang ya waroh i emkaam hajrong kani ka Bill.

Ha iwi tawon i liang u EM uwa pait ya ka tnat Finance, Trade wa Enforcement u Antonio War da ong u, “Kani ka Election chiteiñ samoi ha Ranikor Constituency toh ka wow kyrsu thiah ya ki paidbah yong ka Ranikor wa khamtam ya ka party UDP wow nang pynkhlan chooh chooh ko ya ka party yow yoh yei jop ha kani ka kynti kawa katni.”

“20 snem nadooh wa jop u Dangggo da sdang ki kaam yong i sahdien hapoh yong ka Ranikor Constituency ha kiwa boon ki liang, ki kaam pynroi ym em ki dak ki chin,” ong u War.

Hawa klam beiñ ya u PN Syiem uwa wan mih syndet wow khanglaad ya u kyrtong yong ka UDP u Pius Marwein wow yoh yei jop, u War da ong u wa ka jaitbru Khasi man ko thij kam ki datham ya kiwa ym e laad ki ya kiwi wow ku ki chakhmat wei ya kiwa da sdang ku yaleh ki wow pynhiar chapoh.

Chooh chooh u Antonio da ong u wa lada u PN Syiem u yakhun u ya kani ka Election chiteiñ samoi na Ranikor kam u CEM ka KHADC, ym ar-tatien wa ki 5 tylli ki hima kiwa em hapoh kani ka Constituency lada ym kyrchaan ki ya u PN Syiem daw chah pynhiar ki na ka khet nadooh ki Syiem wa ki Sordar kamwa  jia ha Mawsynram.

“Ha Mawsynram u Syiem yong ka Hima Mawsynram du neidaw wa wym em kyrchaan u ya oo (PN Syiem) ha kani ka Election 2018 wa dang dep, u PN Syiem da pyndooh u ya ka chuki Syiem wei da thung noh da u Acting Syiem, kamtæ nga ong O ya phi wa ki hima wa em hapoh ka Ranikor man ki kiwa embhah neidaw wa u PN Syiem ym em de man CEM u.” ong u Antonio.

Hajrong i pynemkaam bakla u PN Syiem ya ka T. 28 klur, neiliang yong u Antonio da ong u, “Katni nga wa ksoh ya ka tnat Finance, nga ngait wa nga daw ye O u sai yei boon ki kaam baam-tooh yong ka T.28 klur neibhah da leh ya kani khlem tip ki para EM.”

U MDC ka UDP da kyntu u ya ki paidbah ka Ranikor Constituency wymtoh u pdiang ki ya u bru uwa naka chnong Mawsynram uwa da chah kyntait chwa, kiwa kheiñ wa da man Zero u katni.