15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Chah pynsangeh kiwa lai pyrchah yei e thaw yaki CRPF ha Mawlai

I thmu yong ka Seng Samla Mawlai Pyllun wa ki seiñbhalang kiwa em ha Mawlai wow lai cha i thaw yong ka Tribal Research Institute (TRI) wa pait da ka chnat Arts and Culture ka jylla, da chah pynsangeh wei khanglaad ha ki bor pynlai District ka East Khasi Hills neibhah wym em da yoh bor wow lai pynman ya kawon kawon ka pyrchah ha katai ka thaw yong ka TRI. I mih yong ka SSMP deilang wa kiwa chong chnong ka Mawlai ynne ka sngi toh yow pyrchah ya i thmu lai pait ka chnat sorkar ya katai ka thaw wa da pynbaad toh yow e u pynemkaam ka CRPF.

Hadien wa chah pynsangeh noh ha u Magistrate, u PT Passah deiwa emlang ki pulit, neiliang ki khynroo ka chnong Mawlai da chim ki yei rai wow lai yachem ya ki bor sorkar yow pynsñiaw ya i pyrchah.

U President ka SSMP, u Samuel Biam da ong u wa ki nong Mawlai ym ye ki wow ya krehlang wa ki CRPF neidaw wa man ki ki moochynthut ya ki paidbah, wei lada ka sorkar em ko yei thmu wow kyrriah ya ki CRPF toh u booh cha kiwi ki thaw næ cha Mawdiangdiang kamwa da thmu nachwa ym toh wow pynman thaw noh jhep ha Mawlai.

Da ong u leh wa ka SSMP daw booddien ko ya ini i kaam wei daw yachem ko leh ya ki bor wa haneiñ wa kynthup ya ki montri sorkar, deiwa pynrap wa ka sorkar toh u pynemkaam ko ya katai ka thaw ka TRI neibynta i myntoi ki paidbah, heiwa ye wow booh ya ka Tribal Museum, Traditional Park wa kiwi kiwa ye wow e myntoi ya ka sorkar wa ka jylla.

Ini i pyrchah yong ka SSMP toh hadien wa da yoh yutip wa ka sorkar ka em ko yei thmu wow booh thaw ya ki pulit CRPF, ya iwa ka Seng Samla wa ka Mawlai Town Dorbar ym pdiang ki.

Hadien wa da poor smat ini i pyrchah, neiliang ka Deputy Commissioner da phah pynsangeh noh ko ya itai i lai pait ka chnat Arts and Culture. Ha i jooh i por ka chnat da pyntip ko leh cha ki bor wa toh u pait wa ym em iwon iwon i thmu wow ekti cha ka sorkar wow booh ktem CRPF ha katai ka thaw, tangwa ini i lai pait toh neibynta wow booh ya i thaw krehkaam ka Tribal Research Institute.

Share this:
Previous

COVID-19: Hadien 5 sngi boon biang da kiwa chait ya kiwa yoh ha India

Next

Da pynkhai-im biang ya ka yaw Elaka Lakadong kawa jooh em ha Borghat