15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Da pynkhai-im biang ya ka yaw Elaka Lakadong kawa jooh em ha Borghat

Advertisement ad1
Advertisement ad1

Ka Elaka Lakadong lyngba ka Iew Elaka Lakadong Management Committee, ha ka 20 tarik uni u bnai da ye ko wow pynkhai-im biang ya ka yaw Elaka kawa ha Borghat kawa jooh em nadooh ki por u warim wajah. 

Kamtæ ya kani ka yaw da wan wai da u Montri ka sorkar u Kyrmen Shylla uwa man leh u MLA ka 6-Khliehriat Constituency kam u kongsan hei emlang u Justice Lyngdoh, Waheh Chnong Rymbai kam u symbood kongsan, u Lambert Swer, Acting Dolloi Elaka Rymbai, u Siril Suja, u Knightstar Amkhloo ryngkat kiwi kiwi. 

U kongsan hawa klam ha kani ka sngi da yaroh u ya ka Iew Committee ka Elaka Lakadong kawa da ye u pynkhai-im biang ya kani ka yaw kawa em nadooh ki por warim wajah ha chnong Borghat heiwa u Montri da kyntu u ya ka Committee wow pynlai bait pynlai ryntih khnang wa ki paidbah khappood u myntoi ki na kani ka yaw kam ki por nachwa. 

Heijooh i por u Montri da yarap poisa u leh T. 50,000 ya ka Committee wow yoh u pynlai bait ya kani ka yaw hei wow chna ya ka paikhana paidbah, katwa ya kiwi ki kaam u Montri da kyntu u ya ka Committee wow phah ko ya ki kot ki sla cha ka District Administration, East Jaiñtia Hills khnang wow yaklam u wa ki bor District neibynta u chna ya ka thaw booh mar yong ka yaw. 

Da yoh leh i klam ha kani ka sngi na u Justice Lyngdoh, uwa da pynsñiaw i kmen hadien wa da pynkhai-im biang ya kani ka yaw kawa da dooh kawa man ka yaw Elaka kawa jooh em naam nadooh warim hadooh kattæ neibhah da khana ki waheh wasian wa ha kani ka yaw ki mar wa dai khamtam ki dakha da man ki kiwa bang u baam wei boon bha ha ki por dang nynde. 

Ha kani ka sngi da yoh leh yei klam na u Acting Dolloi Elaka ka Rymbai kamjooh na u Pa O Shadong, Dolloi Elaka Lakadong uwa da pdiang sñiawbha ya waroh kiwa wan cha kani ka sngi, da puræ ya ka parom wa tbian yong kani ka yaw da u B. Pala, Adviser Elaka Lakadong uwa da ka khana wa kani ka yaw da em ko nadooh chwa u snem 1971 heiwa dang heipor ka East Pakistan (Bangladesh katni) kani ka yaw da bna naam bha ko neibhah da man ko kam ka kaad khayi wei kam ka luti wa lai u Syiem Jaiñtia ha ki por warim tæ hadien u snem 1971 kani ka yaw da sdang ko u wiar neibhah da khai ka thma Bangladesh katwa kamtæ da sdang ko u wiar khaddooh ha u snem 2002.

Heiwi i liang u Pala da khana u leh wa u Syiem Sutnga u Bor Singh Syiem da poi u cha kani ka thaw lyngba i lai luti hadooh wa ka chnong Borghat da yoh ya ka pyrtuid da ka pyrtuid u Syiem Bor katwa Ghat toh kawa man ka kaad khayi næ ka kaad kawa toh u lai luti u Syiem Jaiñtia cha Jaiñtiapur. 

Khaddooh da yoh leh yei klam e khublei na u N. Talang, Secretary, IELMC uwa da e khublei ya u Kyrmen Shylla, kamjooh ya u Dr. Sankey Shanglung, MDC Bataw Lakadong Constituency kiwa da yarap ya ka Committee neibynta u pynlai bait ya kani ka yaw, da e khublei leh ya ka Borghat Circle U.P. School kawa da chah sñiawbha wow pynman ya kani ka yalang ha pchem ka skur, ya ka chnong Borghat, ya ki chiphaw chnong hapoh Elaka kamjooh da e khublei kyrpang u ya ki waheh chnong Kharkhana, Lumpyngngad, Psawadwar wa kiwi de kiwa wan ha kani ka sngi. 

Ya ka yalang da pynlai  da u E. Mynthlu, Chairman cum Secretary Elaka Lakadong. 

Share this:
Previous

Chah pynsangeh kiwa lai pyrchah yei e thaw yaki CRPF ha Mawlai

Next

Kyntait ka sorkar wa phah jied hapyrdi ka ILP waka Sixth Schedule