Uwi u malik da chah rahbor u hei sngi ka 25 tarik uni u bnai deiwa chah pynsangeh ka thuk-thuk u wei da thap ya oo hapoh kawi ka kari tangwa da yoh wow lai pynlait oo da ki pulit.
Ini toh iwa da jia ha North Garo Hills heiwa heipor kamwa 3:00 waje i sngi, da pyntip cha ki pulit ka Bajengdoba Police Station da ki bru paidbah ka thaaiñ Bolsong wa em uwi u bru da chah rahbor u hapoh kawi ka kari Ertiga kawa man ka kari kamai Tourist wa em Number ML-08K-5869.
Kamtæ da booh thaw pynsangeh kari ha Mansinggre wei heipor kamwa 3:30 dapoi kawi ka thuk-thuk kawa mantre da uwa chah rahbor tangwa da yah ka da uwi na kiwa rahbor deilang wa ka kari Ertiga heiwa manda wai ka, hapoh da chem ya u bru wa chah rahbor.
Katkam wa chem ka takit kattæ, ki le ngut kiwa emkti ha ini i kaam nyngkong da pynsangeh ki ya uni u malik uwa lai luti u da ka thuk-thuk ha Bolsong-Agia Road heiwa da knieh ki ya u chabi ka thuk-thuk, da lute ki leh ya ka Rs. 30,000, da chim ki ya ka Mobile Phone wa rah u, da paan ki leh ya ka Trading License wei da thap ki oo hapoh ka kari Ertiga.
Hawa jia ini, uni u malik da kbai da kiad u yow paan yarap na ki bru heiwa da em kiwa yoo yeini kiwa da pyntip wut-wut cha ki pulit.
Kini kiwa chah kem toh uwa tip kam u Tenggra Ch. Marak (36 snem) uwa na Durabanda Chambugong, South Garo Hills, u Dipon D. Sangma (38 snem) wa u Lovingson R. Marak (33 snem) kiwa waroh ar na Tura, West Garo Hills.
Neiliang u Tenggra hawa kylli takit ya oo da kam u wa oo toh u dkhot ka seiñ United Garo People’s Forum.
Ya kini da pynngat hapoh kiwa boon ki kyndon ka Bharatiya Nyaya Sanhita (BNS) kam ka Section 126(2)/127(2)/135/140(3)/304(2)/3(5).
U SP ka North Garo Hills da ong u wa ki pulit ym e laad ki ya ki bru wa kam toh kiwa man kam ki seiñ NGO wow leh ki ya ki kaam pyrchah aiñ khamtam kitu kiwa chim kabu yow myntoi ki samen.
Da kyntu leh ya ki bru paidbah wow man kiwa husiar wei wow pyntip cha ki pulit lada chem ya kam kini.
Discussion about this post