U SP ka East Khasi Hills, u Vivek Syiem, da pyntip u wa da Suspend ya san ngut ki pulit ka Sohra Police Station wa kyntup ya u Sub-Inspector wa soo ngut ki UB Constable heiyatoh wa iwa jia ya u Getwin Jyrwa uwa da pynbaad wa chah dat wei chah pynchitom u ha ki pulit hapoh kani ka Police Station.
Da Register leh da ka Criminal Case pyrchah ya kini ki pulit hapoh ka Section 120(1)/3(5) ka BNS wei da sdang leh ya ka takit (Departmental Proceeding).
Da pyntip leh wa da leh yeini hadien wa phah takit ya u B. Wanswett, MPS, Sub-Divisional Police Officer (SDPO) ka Pynursla wei ya ka Report da yoh ynne ka sngi.
Chooh chooh da pyntip leh wa ya ka takit won yeini waroh da thung da u pulit wa em ha ka kyrdan Inspector na kawi won ka Police Station yow lait nei leh chiliang.
U SP da ong u leh wa ka Meghalaya Police toh kawa kreh yow pynkrehkaam ya ka aiñ wa kynthup leh ya ki pulit wei daw pynchitom deiwa khor ya kitu kiwa pynemkaam bakla ya ka aiñ.
Kam wow pynkynmoo wa ha ka 7 tarik uni u bani, da yoh ya ka ujor na ka bei u Getwin wa da chah dat u ha ki pulit ka Sohra Police Station hadooh wa hap lai kit oo cha Shillong Civil Hospital.
Ya u Getwin da em ka FIR pyrchah ya oo ha ka 1 tarik uni u bnai wa da booh da u waheh chnong ka Mawkisyiem, Sohra wa da dat u ya uwi u bru ha ka 28-06-25 ha Mawap, Mawkisyiem heiwa da maham u leh ya ki kur ki jait uni u bru.
Ha ka 2 tarik heipor kamwa 9:00 waje i miet da lai thooh ki pulit ya u Getwin na yung u tangwa da yut u chwa wow poi ki pulit, kamtæ ha ka 3 tarik da wan booh ka bei u oo heipor kamwa 11:00 waje i step cha Sohra Police Station wei da pynlait ya oo heipor 8:15 i miet napoh Police Station hadien wa leh ya ka Bail Bond.
Discussion about this post