I jia wym ye mutdur wa kammon da ye kiwa tooh wow rah ya kawi ka synduk nar booh pisa namo ka Safe kawa khia hadooh 2 Ton na yung krehkaam ka dukan KJP Assembly Book Room Jowai, kawa em pyrchah ka Thomas Jones Synod College, Jowai iwa da jia i hei step synyaw ka 23 tarik uni u bnai.
Ya ini da pyntip da u B. Tongper uwa man uwa pynlai ya kani ka dukan dai kot heiwa da khana u wa kamwa jooh leh u man-ka-sngi da poi u ha katai ka dukan heipor 9:15 i step heiwa da khyrngiat u wa ka dwar dien toh kawa da chah tympra.
Hawa lai pait u ya ka kamra kawa da booh ya kani ka Safe da chem wa kiwa tooh da tyngkheiñ ki ya ki nar rod kiwa da pyndait lang ya kani ka synduk ha i chram.
Da antaad u wa ini da jia heipor chiteiñ synyaaw wei da chimpor ya kiwa tooh boon kynta wow pyndep ya ini i kaam yong ki. Da khana u leh wa kini kiwa tooh dang yoh por ki leh wow chet ja, chet baam hapoh katai ka kamra.
Da khana u wa kani ka synduk toh kawa khia hadooh 2 Ton namo 2000 Kilo, wei ym ye mutdur de ha kawon ka rukom wa kini kiwa tooh da rah ki ya kani ka synduk nar deiwa suk khlem da em iwon iwon i piah i madan yung wa i chram yung. “Heipor wa pynpsiah ya kani ka Safe da emkaam hadooh 20 ngut ki daiju,” da ong chooh chooh u Tongper.
Mar sien chem yeini, u Tongper da lai u wow booh FIR hapoh Jowai Police Station wei ki pulit da chimkti ki ya ini i kaam.
Da khana u wa hapoh kani ka synduk da em ka poisa kawa T. 52,000 tam deilang wa kawi ka Mobile Phone. Hapoh yong katai ka Safe wa da em i thoh “This box is purchased by Shri. B. Tongper on behalf of KJP Assembly- Rev. P. Hynniewta.”
Neiliang yong ki bor pynlai ya kani ka Book Room da kyntu ki ya waroh ki paidbah wa lada chem ki ya kiwon kiwon kiwa tyrwa dai ya kani ka synduk wym toh wow thied ki ka tangwa toh u pyntip wut-wut cha ki pulit lane cha kiwa pynlai ka KJP Assembly Book Room Jowai deiwa Phone ha uni u Number-9436301389.
