15 49.0138 8.38624 1 0 4000 1 https://wyrta.com 300 0

Chem ka Environment Committee wa joor tyngkheiñ aiñ ki karkhana wa em ha Byrnihat wa ha Umiam

0 Comments
Advertisement ad1

Shillong: Ka Committee on Environment yong ka yung dorbar Meghalaya Legislative Assembly da pysñiaw ko yei wym sñiawhun heiyatoh wa i yada ya ka rymaw wa da leh da ki karkhana kiwa em ha Umiam wa Byrnihat, Ri-Bhoi District.

Ynne ka sngi ki dkhot ka Committee hapoh i yahkhmat u Chairman uwa man u MLA ka Mawphlang, u Syntar Klas Sunn deilang wa soo ngut ki dkhot, da lai sylli ki ya ki kattu kanti ki karkhana kiwa em ha kitai ki ar thaw wei da chem ki wa kini ki karkhana da pyntngit ki ya ka soodong sookun da ka la-ær bih wa ki jakhlia wa pynmih ki.

Advertisement ad1

Hawa yaklam wa ki laad pathai khubor hadien ka lai sylli, u SK Sunn da ong u wa katkam i chem na ini i lai sylli, i krehkaam ki karkhana wa ah dieñ wa chna Plywood ha Umiam wei kamjooh ka karkhana wa chna nar rod ha Byrnihat ym man ko kawa hun.

U Sunn da ong u wa ka sorkar India lyngba ka chnat Forest and Environment da phah ya ka sorkar jylla wa baroh ki karkhana ha Byrnihat toh u pynbiang ki ya ki laad yada na i pyntngit ya ka la-ær wa ya kani toh u pyndep hapoh ar snem.

“I tngit ka la-ær ha Byrnihat man ko chawa palat ya ki kyndon wa da booh da ka Central Pollution Board, wei ka sorkar India da booh ko ya ka Byrnihat wa toh u pynkhreh ki ya ka Action Plan neibynta wow yada nei tngit palat ka la-ær,” da ong u Sunn.

Da pyntip u wa ya ka Action Plan da pynkhreh da ka State Pollution Control Board yong ka jylla kawa da mynjur leh da ka sorkar pyrdi deilang wa iwa da dep e yumut, “Kawa sah katni toh wow phah ka sorkar pyrdi yaka yarap poisa khnang wa ka sorkar jylla yow ye ko wow pynkrehkaam noh yaka Action Plan hapoh 2 snem,” da ong chooh chooh u Sunn.

Da ong u leh wa ka Committee daw khut ko yaka yalang yong waroh ki chnat kiwa embynta wa kynthup yaka Pollution Control Board, MeECL, Forest, Industries wei wow thooh chooh chooh ya ki kot ki sla wa kammon wow phah ya ka bui (Report) cha ka yung dorbar.

Neiliang u dkhot ka Committee, u George B Lyngdoh da ong u wa ka Byrnihat ka em ko ha khappood wa ka Assam wei ini da wanrah ko yei eh wow pynkhooid ya ka la-ær neidaw wa kini ki karkhana kiwa em cha chiliang yong ka Assam rap pynmih ki boon i jakhlia.

“Neiliang ka Pollution Board yong ka Meghalaya da yaklam ki wa ka jylla Assam kamjooh wa ka Central Pollution Control Board wow yada na ini i pyntngit ya ka rymaw,” da ong u George.

Ha i jooh i por da ong u wa ka Committee daw bichaar ko leh yaka la-ær na iwa em ki karkhana ha Umiam, wa i rukom pynkhooid ya i tngit da kini ki karkhana.

Ha i jooh i por da ong u wa ki karkhana ah dieñ wa chna Plywood ym ye ki u pynemkaam palat ya ki dieñ kamwa da booh da ka sorkar kawa man 25,600 Cubic Metre chi snem.

“Na i pait yong i da chem wa kini ki karkhana ki da pynemkaam ki palat ki dieñ katkam wa da booh da ka sorkar. Ini da pynjæd ko ya ki khloo kiwa boon ha kylleiñ ka jylla khlem da thung biang ya ki dieñ heithaw kiwa da chah ah,” da ong u George.

Also Read: Khang ka Assembly Committee on Environment yaka JNV, Mawphlang

Advertisement ad1

0 Comments

Leave a Reply