Chem ka PAC wa duna ki wakreh wei wym em NICU ha GDGM&CHH

Shillong: Ka Public Accounts Committee (PAC) yong ka yung dorbar chna aiñ da hiar sylli ko ya ka Ganesh Das Government Maternal & Child Health Hospital (GDM&CH), Shillong, heiwa da chem ko chiboon i duna ha kani ka thaw sumaar sorkar iwa kynthup nadooh i duna kiwa kreh wa i wym em ka Intensive Care Unit (ICU) neibynta ki khynnah namo ka Neonatal Intensive Care Unit (NICU).

Ya ini i lai sylli da yahkhmat da u Chairman ka PAC uwa man leh u MLA ka Mawsynram, u Himalaya Muktan Shangpliang hadien wa kani ka thaw da chah pynbaad ko wa ym em pdiang ko ya kawi ka manbei wa lai kha khon ha kani ka thaw neidaw wym biang ki tiar pooid.

Hawa yaklam wa kiwa pathai khubor, u Himalaya da ong u wa ka Committee daw phah ko ya ka bui neiwa chem ko chirup wa ki yumut cha ka sorkar khnang wow chim ko ya ki laad ki luti wow pyntikna wa kani ka hospital u ye ko u e i chakri wa pura ya ki paidbah.

Da ong u wa kani ka thaw sumaar em ko 400 tylli ki palong wei du 20 ngut ki Doctor kawa toh wow em 25 ngut ki Doctor, katwa ki nurse em ki du 120 ngut katwa da mang wow em 180 ngut, kawa da pynman ya kani ka thaw wow duna ko hadooh 5 ngut ki Doctor wa 60 ngut ki Nurse.

Related posts

Pynkhreh ka BJP Meghalaya ya ka Election 2028 deiwa pynskem ya kiwa kitkaam thymme

June 14, 2025

Kyntait ka Agatha Sangma wow man ka kyrtong MP cha Rajya Sabha

May 29, 2025

U Himalaya da pynsñiaw u wa i slem wow ekti ya ka yung thymme cha ka Hospital ya kawa da booh wow pyndep nadooh u snem 2017. Da ong u leh wa ki sahep (Engineer) kiwa toh wow pait ya ini da kular ki ya ka Committee wow ekti noh ya i kreh hapoh 6 bnai.

U Chairman ka PAC da ong u leh wa Committee da chimkhia bha ko yei wym em kani ka thaw sumaar ya ka thaw neibynta ki khonboo kiwa joor i chitom kawa tip kam ka Neonatal Intensive Care Unit (NICU).

Da ong u wa ka NICU man ko kawa emkaam bha khamtam neibynta ki khonboo kiwa da kha khlem biang bnai, da ong u leh wa ka PAC da phah ko leh ya ki bor ka Hospital wow phah noh ki ya ka chithi cha ka sorkar neibynta i emkaam kani ka thaw sumaar.

Hajrong i chah pynbaad kani ka thaw wa ym pdiang ko ya kawi ka manbei wa wan kha khon ha ka 2 tarik uni u bnai, u Chairman da ong u wa ki bor pynlai da pynche ki wa ha katu ka sngi ki tiar pooid ym em de ki neidaw wa dadep pynemkaam ha ki 8 ngut kiwi won ki manbei.

Also Read: Toh du nei sñiawthooh bakla hapyrdi kawa chah sumaar wa ki Doctor wa chah kyntait kawa kha khon ha Ganesh Das: AL Hek