Kawi ka kynthai Russia da chem wa sah ko ha iwi i krem wa em ha uwi u loom wa tip kam u Ramatirtha deilang wa ar ngut ki khon khynthai ha thaaiñ Gokarna ka Karnataka heiwa da lai sai noh ki da ki pulit neidaw wa ini thaw ymtoh iwa man chngaaiñ.
Ya kani ka bru da chem da ki pulit ka Gokarna heipor wa lai leh Patrolling hei janmiet ka 9 tarik heipor kamwa 5:00 waje yow pyntikna wa kani ka thaw man ko kawa chngaaiñ ya kiwa uiñke suwari wei kani ka krem wa chem toh kawa em chapoh khloo bha.
Ki pulit manda poi ki ha kani ka thaw da yoo ki yeiwa em ki that ki nep bru hajan ka krem kawa man leh ka thaw wa khlan bha u oor khyndaw, wei manda lai ki cha kani ka thaw da chem ki ya ka Nina Kutina (40 snem) kawa na Russia wei da sah ko hapoh kani ka krem da jan dap ar tayaaw deilang wa ar ngut ki khon kynthai kiwa 6 snem wei 4 snem i rta.
Kani ka bru da pynchna ko ya kani ka krem kam ka thaw wow leh Puja wei wow leh Meditation wei da thiah ki hajrong Plastic katwa yei baam won da baam ki da ki Instant Noodles.
Hawa kylli takit ya ka da khana ko wa da wan ko na Goa cha Gokarna yow yoh u em samen wei da jied ko wow sah chapoh khloo ha ini i krem yow ye ko wow leh Meditation wei wow duwai deiwa jngai na ki chnong ki thaw, tangwa neiliang ki bor sorkar da khuslai ki yei long i man kini ki khynnah wow im ha ini i thaw.
Uni u loom Ramatirtha khamtam ini i thaw wa em ini i krem toh iwa dang dep wow maad yei oor khyndaw ha uni hi u bnai ynnin u snem wei em leh boon ki mrad khloo wa im heini deilang ki pseiñ wa em bih iwa da pynman yeini i thaw wa maa bha.
Hadien wa batai ya kani ka manbei yei maa wow im heini i thaw, da bien ko wow mih neini i thaw wei da paan donhi ko wow lai booh ka cha ka Ashram wa pynlai da ka Swami Yogaratna Saraswati, kawa em 80 snem i rta ha chnong Bankikodla.
Hawa kylli takit chooh chooh ki pulit ya ki kot ki sla kani ka bru kam ka Passport kamjooh ya ka Visa ko da ong donhi boi da wiar ki chapoh khloo heipor wa wan ko cha kani ka krem.
Hadien wa thooh ki pulit deilang ki bru ka chnat Forest da chem ya ka Passport wa ki kot ki sla ko wei da pynyoo ki wa kani ka bru da psiah ko cha India deiwa pynemkaam da ka Business Visa kawa da kut noh ha ka 17-04-17 wei da yoh ko ya ka Exit Permit wa da e da ka FRRO Panaji, Goa ha ka19-04-18. Hadien ini da lai ko cha Nepal tangwa da psiah biang ko cha India ha ka 08-09-18 iwa mut wa da sah ko pyrchah ya ka aiñ ha India da boon snem.
Neidaw wa kani ka bru da tyngkheiñ ko ya ka aiñ Visa, da rah noh ya ka deilang ki khon ko cha ka Women’s Reception Centre wa em ha Karwar wa pynlai da ka Department of Women and Child Development.
Ya kini daw lai yah hakhmat ka Foreigners Regional Registration Office (FRRO), Bengaluru yow phah liwan biang ki cha ka ri ki.
Discussion about this post