U MLA ka Jowai, u Wailadmiki Shylla hawa e yei klam ynne heipor wa wai ya ka yung krehkaam ka Seiñ Kynthai ka Khliehtyrshi, da ong u wa ha kani ka kynti ym yoh wow chna ya ka sorkar kawa na kawi donhi ka Party tangwa da hap kreh wa ki 7-8 tylli kiwi ki Party wei du ha West Jaiñtia em san tylli ki Constituency wei kini waroh em ki ha ka sorkar wei kat iwa yoh hap yabhah salonsar pyn san Constituency. Da ong u wa na kini ki san MLA, le ngut toh ki Montri sorkar wei ymtoh i kaam wa suk ya oo uwa dang sdang wow yasait wow yaknieh wa kini ki Montri sorkar hanla kattæ leh da kreh da thooh laad thooh luti u.
Da ong u wa katkam wa mih ha ki Social Media boon kiwa klam wa beiñ wa har rukom pyrchah ya oo tangwa mylliñ ki paidbah wa oo yoh u wow kreh du le snem donhi na ki san snem wei da bichaar ki ya oo kam u Montri sorkar neibhah ka Jowai Constituency jooh yoh Montri bait ko, tangwa lada bichaar para MLA da sñiaw u wa da kreh bha u khamtam ha ka chnong Khliehtyrshi.
Da kdaw u wa mar jop u da e yarap u T. 5 lak wow chna pyndep ya ka yung dorbar ka chnong Khliehtyrshi neibhah kani ka chnong man ko kam ka “Trump Card” namo ka chnong wow rai pynjop ya ki MLA.
Heiyatoh wa kiwi ki dong neiliang yong oo da e yarap u ya ka Moopyllaitsyiar, da e yarap u ya ka wow chna ya ka yung dorbar wei manda dep da paan yarap ki sa neibynta ka yung skur kawa da slem wei da thooh yarap u katwa yoh wei da ye u wow e T. 40 lak tam neibynta kani ka yung skur katkam ka juk wa katni.
Da ong u wa da e yarap u T. 5 lak ya ka Seiñraij wow chna ya ka yung dorbar, wot ki seiñkur, ki balang waphær waphær nadooh ka Balang Presbyterian ka Balang Seventh Day, ka Balang Adventist wa kiwi kiwi heiwa da yarap u ya ki waroh katwa joh i bor yong oo wei ym jooh kyntait u ya ki.
Heiyatoh wa ki sarok ki luti syngkieñ da e u hadooh 4 Km ya ka chnong wei yooluti u wa dei kyrchaan ki ya oo wei lada yoh u ya ka chuki Montri daw ye yarap rap boon ya ki.
Chooh chooh da ong u wa kut sien wa man yalang ha ka madan ka chnong da hap chna dara (Pandal) bait wa ktah yei lut ka chnong wei da thooh laaad u na ka chnat Sports heiwa da yoh u chna ya ka VIP Gallery wei da yoh leh ya ka thaw kylliang sula (Dressing Room).
Da kdaw u leh ya ka Scheme um JJM yong ka sorkar pyrdi heiwa da poi ka umdih ha man la ki thlu yung hanla em ka kyndon wa lada em ka Scheme PHE ha ki chnong ymtoh de u yoh ki ya ka JJM tangwa dei da lai luti da thooh ki laad wei hadien wa yaklam wa u Montri ka chnat PHE da yoh ya kani ka Scheme kawa thymme kawa T. 24 klur wei da poi ka um ha man ki manyung ka chnong.
U Waladmiki da kdaw u leh ya ki Scheme cha ki bru samen nadooh ki kymmor, ki tin, ki Cheque wa kiwi kiwi wei ym ye wow e chisien e deiwa kyrpaad ya ki paidbah wa ymtoh u jhan ki.
Heijooh i por da ong u wa ha ki san snem ym kwah u wow kreh neibynta i kwah ki bru tangwa neibynta iwa emkaam yong ki neibhah em i yaphær bak la bak hapyrdi i emkaam wa i kwah.
Da kdaw u leh ya u sarok na Khliehtyrshi cha Treiongriang uwa da slem wei ha kani ka kynti da ye wow sdang kreh noh.
U Wailadmiki da kyntu u leh ya ki paidbah wow kyrchaan biang ya oo ha kani ka kynti khnang wow ye chooh u wow kreh neibynta ka mynried mankawi katkam wa angnood ki paidbah ka chnong.
