U MLA yong ka KHNAM na North Shillong, u Adelbert Nongrum da kyntu u ya ka sorkar wow khut pynbait smat noh yei dawa yong ka Meghalaya Joint Action Committee of Commercial Vehicles, chwa wa ka yakhih u heh ko.
Ha i jooh i por da pynsñiaw u yei kyrchaan yei yakhih yong ka JAC, deiwa ong wa na i por cha i por ki paidbah da suki hi-eh ki hawa ku dor ki mar ki mata wei ym em kiwa mih chahkhmat iwa pynman yaka sorkar wow kheiñ jem.
Da ong u wa ka sorkar ym toh u paitke hi-eh ko næ wow man kawa thlah hajrong ini i yakhih, wei lada ym ye wow pynbait ya ini i eh, ini mut wa ym man ko kawa biang wow synchaar ya ka jylla. Da ong chooh chooh u wa ka sorkar toh u pynduna noh ko ya i dan yow lait u chah ktah ha kiwa boon ki liang, khamtam wa kani ka yakhih da ktah ko ya ki kup chiliang ki sem chiliang wa boon ki warep wei kamjooh kiwa im sngi ha yaw da doohnong ki neibhah wym em ki kari kamai.
Ha i jooh i por u Adelbert da kylli u leh ye ki karo soo JNNURM, wa cheiwon iwa mih na ki da lai i wei ym toh wow chim kabu wa em ki kari wa pynlai da ka sorkar dei wym ap dei ya kiwi won.
