U Montri wa pait ya ka chnat Kaam Pohyung ka jylla u Lahkmen Rymbui da kam u wa i dor yong i phniang kari rap toh dor i ha Meghalaya hawa nujor wa i dor ha Assam wa Delhi.
“Katkam i yoo wei chem i yong nga, i dor yong i Petrol wa Diesel rap duna i hapoh Meghalaya hawa nujor wa ka Assam kawa rap heh da 3 tyngka, lada ha Meghalaya man ko 81 chi liter ha Assam man ko 84 tyngka chi liter wei kamjooh leh hawa nujor wa ka Delhi leh, dang toh dor ha Meghalaya da 5 næ 6 tyngka,” da ong u Lahkmen hawa klam cha ki laad pathai khubor ynne ka sngi.
U Lahkmen u da ong u wa i dor Petrol wa Diesel ym toh wow booh da ka sorkar jylla tangwa toh iwa da leh wei booh da ka sorkar bei, heiwa da pynpsiah leh ya ki dan waphær waphær.
Chooh chooh u Montri da kam u leh deiwa ong wa hapoh Meghalaya lada pait yei syad i Petrol wa kiwi ki jylla yong ka ri, ka Meghalaya u em ko ha ka kyrdan kawa 5 natre dooh ym toh ha ka kyrdan kawa haneiñ.
Kamwa man katni, i dor yong i Petrol hapoh Meghalaya da ku cha ka T. 90.54 katwa i Diesel T. 83.15 wei hawa nujor ya i dor yong i Petrol ha ki jylla waphær waphær yong ka ri, ka Meghalaya ka wan ko hadien yong ka Mumbai ha i syad dor heiwa ha Mumbai i Petrol chi liter man ko hadooh T. 92.84 katwa kiwi won ki jylla ki dang em hapoh yong ka 90 tyngka chi liter.
Hawa yatoh wa ka Cess næ ka dan i bai phniang kawa da bhah cha ka chnat puræ puthi ka jylla, u Lahkmen da ong u wa hadooh katni ym pu em i kheiñ katwon ka chnat ka yoh ko tangwa ka Cess næ i bhah ym toh du na i Petrol, da em leh na u moochuni, u moo salin iwa ka chnat yoh ko neibynta i emkaam yong ka.
Da ong u leh wa neiliang u Montri Rangbah ka jylla u Conrad K Sangma da pynbna u T. 100 klur ha uni u snem wow pynlut neibynta i bha i miat yong ki 200 tylli ki skul sorkar wei kamtæ iwa boon hi ka poisa toh kawa wan bait na ka Cess.
