15 49.0138 8.38624 1 0 4000 1 https://wyrta.com 300 0

Chimbynta ar ngut ki MLA deilang wa ki i hajar ngut ki paidbah ha ka yalang pyrchah ya ka CAB

0 Comments
Advertisement ad1

Shillong: I pyrchah wow pynman aiñ ya ka Citizenship Amendment Bill, 2016 nang joor ko ha ka jylla Meghalaya heiwa ki seiñbhalang waphær waphær hapoh i yahkhmat ka North East Student Organisation (NESO) da lum yalang ki ha nongbah Shillong.

Chwa ka yalang da pynman leh ya ka lai paidbah na yungkremkaam ka KSU kawa em ha Jaiaw hadooh ka thaw pynyeiñ kari wa em ha Mawkhar heiwa da ki hajar ngut ki paidbah da ya chimbynta ki.

Advertisement ad1

Ha kani ka yalang pyrchah ya ka CAB da emlang 2 ngut ki MLA wa kynthup ya u Hamletson Dohling uwa man leh u General Secretary warim ka KSU wei katni u montri ha ka sorkar MDA wa u Lambor Malngiang, MLA samen na Nongkrem uwa man leh u Chairman ka Meghalaya State Planning Board (MSPB) nalor u Chairman ka NESO u Samuel Jyrwa, kiwa yahkhmat ki seiñbhalang wa kynthup na Garo Hills, ka Garo Student Union (GSU), ka A’chick Youth Welfare Organisation (AYWO) wa na Khasi-Jaintia Hills da emlang ki dkhot ka KSU, FKJGP, SSSS, RBYF wa HNYF.

Hawa klam ha ka yalang, u Hamletson Dohling da ong u wa oo yeiñ u wow pyrchah ya kani ka Bill kam u dkhot yong ka jaitbru deiwa booh chwa ya ka chuki cha rood, deiwa wa pynrap wa toh u pynyoo bait ya ka mynsien maya ya ka jaitbru.

Da ong u wa ka sorkar MDA em ko ka jooh ka kitkhlieh neibynta ka jaitbru wei ka pyrchah joor ko ya ka CAB nadooh chwa wa ka Joint Parliamentary Committee (JPC) ka wan ko wow ap ya ka i sñiaw ki paidbah, wei katni hi ki jylla ka thaaiñ mihsngi da kyruiñ ki cha ka Meghalaya kawa da pyrchah nyngkong ya kani ka Bill da ki montri yong ka.

Chooh chooh da ong wa ka jylla ym ke u pdiang ya kani ka Bill du neibynta wow myntoi saiñpyrthai yong kawi ka Party. Da pyntip u leh wa da em ka yaklam hapoh ka sorkar jylla wow chna ko ya ki aiñ wa khor wa kyrpang yow yada ya ka jaitbru lada ka sorkar India lai ko chakhmat wow pynman aiñ ya ka CAB.

Neiliang u Chairman ka NESO, u Samuel Jyrwa da ong u wa ya ka jylla Meghalaya da pynyabi waka ri India lyngba ki ktang suloi da iwa phah wow soi yabor ya ka Instrument of Accession (IOA), wa i thombor ya ka jaitbru kawa dang pteiñ hadooh katni.

Da ong u wa hadooh katni ka sorkar India ka wanrah ko ya ki aiñ wow pynmadan lut ya ki jaitbru wa khian paaid ka thaaiñ mihsngi kawa wanrah yei ma ya ka jylla Meghalaya nyngkong dooh neibhah wa em ko u pood wa jrong hadooh 443 Km waka Bangladesh wei ki daw sah kut ki ha Meghalaya.

Ha kani ka yalang da yoh leh yei klam na kiwa mihkhmat ka JSU, KSU, FKJGP, SSSS, RBYF wa HNYF kamjooh naka GSU wa AYWO kiwa da beiñ joor ya ka sorkar India kawa thmu wow pynman aiñ ya ka CAB.

Advertisement ad1

0 Comments

Leave a Reply