Jowai: Kam chibynta wow pynkhlan wei wow pynkrai ya ki thawaner yong ka, ka People’s Democratic Front (PDF) ynnin ka 21 tarik da seiñ ko ya ka People’s Democratic Front Zonal Committee Nartiang Constituency wei da pynmih leh ya u Draison Kharshiing kam u kyrtong cha ka Election MLA 2018.
U Draison da jooh man u kam u MLA warim kani ka Constituency (2003-2008) wei da man u leh kam u MDC le sien (1989-1994, 1994-1999, 1999-2004) na ka Moobakhon-Khanduli Constituency. U Draison chirup wa kiwa kyrchaan yong oo da pdiang burom ya ki da u President ka PDF Central Executive Committee u Ivanlumlang Marbaniang hei emlang u General Secretary u Auspicious Lyngdoh, u Organizing Secretary na Ri Bhoi District u Dipshon Ryntathiang, u Joslin Marboh uwa man u Organizing Secretary ka PDF Zonal Committee Mawryngkneng Constituency, u Return Sna uwa man kam u MDC warim (2004-2009) ka Moobakhon-Khanduli Constituency wa kiwi kiwi.
Hanlada joor u slap wa ka la-ær u Draison chirup wa kiwa kyrchaan ya oo kiwa em palat 3000 ngut da yawan ki ha ka chnong Sohphoh wei da iwi i sur da rai ki wow psiah noh cha kani ka seiñ wa thymme.
Ka 1-Nartiang Constituency toh kawa da mihkhmat da u Sniawbhalang Dhar uwa man leh kam u montri warim ka sorkar MUA II wei uwa da thmu wow yut noh na ka Congress wow yakhun ya ka Election MLA 2018 na kawi tawon ka seiñ.
Kani ka yalang man ko leh ka yalang wa nyngkong ya ka People’s Democratic Front wow pynsñiaw ya ki thong krehkaam yong ka neibynta ka Election MLA 2018 ha Ri Loom Jaiñtia heiwa ki padibah da chong ki hapoh yung ki bru, ki kari, wa kiwi kiwi neidaw wa pynthut u slap.
U Ivanlumlang Marbaniang hawa pyllai ya kani ka yalang da ong u wa ka Party hi ym yoh por ko wow jubab namo u klam yeiwa klam kiwi ki seiñ pyrchah ya ka wei katkam wa man hi da psiah ko cha Jaiñtia Hills lyngba ka Nartiang Constituency.
“Kam ka Party dap ko dei kmen neibhah wa da ye u psiah wei wow soohthied chapoh Ri Loom Jaiñtia, iwa pynyoo wa ka seiñ yieñ ko neibynta ka Ri Loom Khasi-Jaiñtia” da ong u Ivanlumlang uwa da kdaw wa ym myntoi wow kreh neibynta i roi i paar namo wot wo thied vote kat wympu ye u wanrah ya ki aiñ kiwa ye u yada ya ki tre chnong tre thaw ka jylla.
“Ym em pyrkhat O wow uiñ biang cha ka kaam saiñ hima wow kamai spah wei kamwa da leh bha O ya ka Constituency ha ki por wa man O kam u MLA ka MLA Scheme toh du 50 lak donhi, tangwa katni nawon ka MLA Scheme da kynjoh ko T. 2 klur chi snem iwow yarap ya nga wow chakri ya ki paidbah” da ong u Draison Kharshiing.
Da kular u leh wa ha kani ka kynti lada jop u kam u MLA chiteiñ na ka tulop yong oo u e u ka cha ka imlang sahlang wow e yarap ya ki paidbah.
“Ym artatien de O, ha kani ka kynti daw poi biang O kam u MLA ka 1-Nartiang Constituency wei tip O wa chong ha ki paidbah kiwaa kyrchaan ya nga ki wow yakrehlang wa nga wow wanrah yei kylla hapoh ka Constituency waroh kawi” da ong u Draison deiwa pynrap wa ki paidbah ymtoh u artatien de ki neibhah wa oo daw yieñ yaleh bait u ha kani ka kynti na Nartiang Constituency kam u kyrtong ka PDF kawa em yaka chaap hei dur i mombati.
Ha kani ka yalang kiwi kiwa da e i klam toh u Joslin Marboh, u Dipshon Ryntathiang, u Auspicious Lyngdoh, wa kiwi kiwi.
Discussion about this post