August 4, 2021
Advertisement
U MLA ka Khliehriat uwa man leh u montri ka sorkar jylla ha ka chnat Revenue, u Kyrmen Shyllada ong u wa man i iwa eh bha wow pynbait ya u pood u ang ka jylla neibhah wa kiwa chong chnong ha khappood ym wan ki chaphrang wow Register næ pynpsiah pyrtuid ya ki thaw wa em ki.
Da ong u wa i wym wan Register da pynmih i leh yei kynaad ha ki 12 tylli ki thaw wa da tip wa jooh em i kajia iwa da wanrah leh yei eh i khoo ha waroh ar tylli ki jylla.
Da ong u wa kamwa man katni i yaklam pynbait pood da lai i chaphrang deiwa kyntu u leh ya ki paidbah wow mih ki chaphrang wow Register ya ki thaw yong ki khnang wow lait na i eh i khoo hadien habood.
Hawa kylli yei dor wow Register thaw ha Meghalaya da man i iwa heh ware kamwa da kdaw da u MLA ka Mawkyrwat, iwa pynman ya ki paidbah wow kiar ki wow Register, u Kyrmen da ong u wa i dor neibynta wow Register ya ki thaw da ebor ha ki Deputy Commissioner wow pynbait ha jar jiar ki thaw.
Heijooh i por da pyntip u wa ha ka yalang ka wow man ha sorbah Guwahati ha 6 tarik uni u bnai wow yaklam pynbait ya u pood hapyrdi ki ar jylla daw embynta leh ka dhab ki montri sorkar na waroh ki ar jylla hapoh i yahkhmat ki montri rangbah.
