Ha ka lyngkhooh sngi burom wa 190 snem yong u Syiem Tirot Sing Syiem da lehkmen ka deiwa wai ya u mot sahnaam wa chi rynyieñ wa jrong 24 prooh (Feet) ha Laitarted, Nongthliew, Eastern West Khasi Hills da ka seiñ Hynniewtrep Youths’ Council wei man ko leh kam ka sngi dap 11 snem yong ka seiñ.
Da wa wan wai paidbah ya u mot da u Dr. K. M. Syiemlieh, Syiem Khynnah ka Hima Nongkhlaw ryngkat wa u Roykupar Synrem, President HYC deiwa emlang kiwa kitkaam rangbah wa kynthup ya u Rhembor G Saibon, u Saiñpyniar Lumlang, u Donboklang Kharlyngdoh, u Isaac Basaiawmoit wa kiwi kiwi de.
U Dr. K. M. Syiemlieh hawa e yei klam da yaroh u ya ka HYC yeiwa da ye ki wow pynyieñ ya uni u mot yong u Syiem Tirot Sing Syiem wei da kyntu u ya ki khynroo khyllood wow bood ki ya ka mynsien maya ri u Syiem Tirot Sing Syiem ha waroh ki kaam wa da leh da kreh ki ha ka imlang sahlang yow pynku ya ki paradoh parasnaam.
Neiling u President ka HYC da pynsñiaw u yei sñiawngooh ya kiwa yahkhmat warim ka seiñ kam u Peter Lawai wa u Robert June Kharjahrin kiwa da prat luti ya ka seiñ hadooh wa da yoh laad wow chna ya uni u mot wa jrong 24 prooh yong uni u syiem wa khroo, u Tirot Sing Syiem.
Ya uni u mot da tah da pynwandur da ki bru u Raphael Warjri na ka Riti Academy kiwa kynthup ya u Banteilang Hynñiewta, u Returnwell Sutong neitæ kiwa yarap wa kynthup ya u Ialissing Mawrie, u Banjop Leo Kharmalki wa u Ban Mawrie. Ha kani ka sngi da pynlait leh ya ka kotdur lakdop chaphang i yakhun laitlooid yong u Syiem Tirot Sing wa ka kot hajrong ka synchaar paidbah u Khasi (Khasi Folk Democracy) wa da thoh da u Raphael Warjri ha ka ktien phareng wei da yoh leh yei rwai pynwyrngia na ki Snow White, ka Khmih Creative Society, ki Thunder’s Cave wa na ki bru u Akbar Nongdhar.
Discussion about this post