U heh ka BJP ha Maharashtra, u Devendra Fadnavis ynne da baamsmai u kam u montri rangbah ka Maharashtra wei da pynbaamsmai ya oo da u lat ka jylla, u Bhagat Singh Koshyari ha Raj Bhawan, Mumbai katwa u heh ka Nationalist Congress Party (NCP) u Ajit Pawar won da baamsmai u kam u symbood montri rangbah.
Neiliang u montri rangbah ka ri, u Narendra Modi ha u Twitter da e khublei u ya kini ki ar ngut wa da baam smai ki ynne dei kyrmen wow wanrah ki yei tyrchaaiñ ha ka jylla.
Kam wow pynkynmoo heini ka Election ha Maharashtra da pynman ha ka 21 Naichiphaw wei ya ki Vote da ñiaw ha ka 24 Naichiphaw heiwa na ki 288 tylli ki seat emkaam wow yoh 145 tylli wow yoh u chna ya ka sorkar.
Hadien wa pynbna ya ka result ka BJP da yoh ko 105 seat, bood won ka Shiv Sena wa yoh 56, neitæ ka NCP 54 wa ka Congress 44 tylli.
Chwa ini u heh ka NCP, u Sharad Pawar da khreh u wow pdiang yei tyrwa ka Sena wow man kam u montri rangbah ka jylla.
Ka BJP, kawa yoh boon seat dooh leh ymye ko wow pynhun ya ka lok yong ka, ka Shiv Sena wow chna sorkar neidaw wa ka Shiv Sena kwah ko wow kylliang ya ki montri rangbah wei wow yoh salonsar ya ki montri.
Hadien ini ka Shiv Sena da khlaad luti ko wa ka BJP wow thoohlaad wow chna sorkar tangwa ymye ko wow yoh ya ki MLA kamwa da emkaam (145) hapoh i por wa da booh u lat.
Hadien ini da tyrwa ya ka NCP, wow pyrchang ko u chna sorkar lym kamtæ daw ekti noh u synchaar da ka President Rule.
Discussion about this post