Ka Congress kawa em ha ka Liang Pyrchah da pynsñiaw ko yei sñiaw lyngngoh wei chrai ya ka sorkar Meghalaya Democratic Alliance (MDA) wa da yoobeiñ wei leh mylliñ wow khut cha i ya e yumut hajrong u pood u ang, kawa da pynman ha ka 15 tarik uni u bnai.
Kawa yahkhmat yong ka Congress Legislature Party (CLP), ka Ampareen Lyngdoh da ong ko wa ym toh wa ka Congress ym em lai chimbynta ko ha kani ka yalang tangwa toh i wym burom wei i wym pyntip da ka sorkar MDA kawa khut pynman ya ka yalang.
Ka Ampareen da ong ko wa hawa nyngkong dooh, da em i wym che ha ini i khut ya ka yalang yong waroh ki seiñ saiñpyrthai (All Party Meeting) wow ya phyllu hajrong ki kaam wa yatoh wa ki kaam pynbait ya u pood u ang yong ka jylla da ka sorkar MDA.
Da ong ko wa ini ym toh i sien nyngkong wa ka sorkar da lai lait ko ya ka Congress ha kini ki kaam wa jhan wei wa emkaam chiboon bha, wei da jia leh ha ka sngi wa lai yooh kjat ki ar ngut ki Montri Rangbah ha Langpih ini wadep, heiwa u MLA wa MDC ka Congress na katu ka thaaiñ kiwa man kam ki dkhot ka Committee ym em yoh chithi pyntip wow lai cha ka yalang tangwa kini waroh ar ngut da lai bait ki cha ka yalang.
Ka Ampareen da ong ko wa man iwa bakla wow pynsñiaw won cha ki paidbah wa ka Congress ym em wan ko cha ka yalang deiwa pynrap wa ka seiñ Congress ka sñiawlyngngoh wei chrai hakhmat ka sorkar MDA kawa da kyntait yei e yumut neiliang ka seiñ hajrong ini i kaam yap kaam im khlem burom lang næ wow ap lang.
