May 22, 2020
Shillong: U Montri wa pait ya ka chnat i rep i riang ka jylla, u Banteidor Lyngdoh da ong u wa ka chnat Agriculture & Farmer’s Welfare da booh ko ya ki yaw dailang, kam ha 5 Mer, Upper Shillong wa kiwi kiwi kam ha Williamnagar, kamjooh leh ka yaw rood sarok ha Ialong, West Jaiñtia Hills wa ha Pynursla, East Khasi Hills.
U Montri da ong u leh wa neiliang ka yung krehkaam u Director da e ko leh ya ki Car Pass ya ki kari yong kiwa khayi kiwa pynpoi ya ki mar rep cha kylleiñ ki bynta ka jylla, hajrong wa ka chnat da pynkhreh ko ya ki kari 1917 iTEAMS kiwa lai thied ya ki mar rep na ki thaaiñ palatsor wow pynpoi cha ki dukan chnong.
Chooh chooh u Banteidor da ong u wa ka chnat da booh ko 12 tylli ki yaw neibynta ki warep wa 15 tylli ki yaw rood sarok kiwa krehkaam katni, nadooh wa da khang ka yaw dailang ha Iewduh neidaw ka Lockdown.
Hajrong i khang ya ki yaw dailang ha Iewduh iwa da wanrah ya i eh i khoo ya ki warep wow dai ki ya ki mar yong ki, u Banteidor da ong u wa ka chnat daw pait bniah ko yeini deiwa ong leh wa ka sorkar daw pyrchang ko wow booh ya ka yaw dailang ha khap sor.
Da ong u leh wa neibynta ka Scheme Krishi Karman Awards yong ka sorkar India da mang T. 99 lak wow pynpoi symbe cha ki warep.
