U Montri Rangbah ka jylla, u Conrad K Sangma da ong u wa ka sorkar kreh chitom ko u khang yei tih wa i khayi pyrchah aiñ ya u mooyong wei wow pynchitom ya kitu kiwa da chem wa emkti deiwa pynngat ha ki kyndon yong ka IPC wa MMDR Act.
Da ong u wa ki bor pynlai District leh da pyrchang ki wow yada ya ki kaam chalan wei khayi mooyong pyrchah ya ka aiñ deiwa lai sylli lai kynreh man-i-por wei da pynemkaam leh ya ki ‘Drone Camera’. Da ong u wa hadooh u Naisaphra uni u snem da em kamwa 652 tylli ki Case wa da Register du ya ki kaam khayi mooyong pyrchah ya ka aiñ wei na kini da Charge Sheet ya 1354 tylli wei da chah rai pynrem 472 ngut.
Hawa yatoh wa i tih mooyong pyrchah ya ka aiñ, da khana u wa da em 199 tylli ki Case wa da Register, 108 tylli da Charge Sheet wa 23 tylli da dep rai pynrem.
U Montri Rangbah da ong u wa neiliang ka sorkar da chim lut ko ya ki luti hawa tip ki wa em iwa jia wa i wa i khayi pyrchah aiñ ya u mooyong.
Chwa ya ini, u MLA ka Mawlai Constituency, u Process T Sawkmie hawa wanrah ya ka yatai (Call Attention) hapoh ka dorbar ynne hajrong i yap kiwa kreh mylla mooyong, deiwa ong leh wa i tih mooyong katkam ki kyndon yong ka NGT wa ka Supreme Court toh du neibynta kiwa heh spah, katwa kiwa tih mooyong wa khian ym ye de ki neibhah emkaam wow pynlut poisa deiwa boon wei hap ki wow bood ya ki kyndon kiwa kyllaiñ.
Neiliang uni u MLA wa da chah beh (Suspend) yong ka Congress da kyntu u ya ka sorkar wow pait rap bniah biang ya ki kyndon wa chah yow tih mooyong wei wow rap pynjem ya ki kyndon neibynta wow yohlaad lang kiwi wow kreh mooyng kiwa rap khian.
