Da dep e thaw ka sorkar cha 2426 ngut ki bru wa ki seiñ

Ka sorkar Meghalaya da dep e ko ya ki thaw wa tip kam ki Revenue Land cha 2426 ngut ki bru samen deilang cha ki seiñ lyngba ka chnat Revenue and Disaster Management, da pyntip u Kyrmen Shylla uwa man leh kam u Montri kani ka chnat hawa jubab yeiwa kylli u MLA ka Nongkrem, u Ardent Basaiawmoit ynne hapoh ka yung dorbar chna aiñ.

U Ardent da ong u wa da tip u wa em ki bru kiwa na Bangladesh kiwa da yoh thaw ha Rynjah heipor wa em ka thma yaleh laitlooid ka Bangladesh ha u snem 1971 tangwa da dai ki ya kini ki thaw wa da e ka sorkar cha ki khlem da pyntip.

U Kyrmen da pyntip u wa yeini da leh katkam ka aiñ Assam Land Revenue Regulation, 1886 deiwa e wai yei thaw wei ymem wa oo yei pyrtuid ki bru wa da dai yei thaw yong ki.

U Ardent da kylli u wa lada em ki MLA næ kiwa emyatoh ki MLA kiwa da yoh thaw na ka sorkar heiwa u Kyrmen da ong u wa hawa e thaw lada biang lut ki kot ki sla, da e thaw cha ki katkam ka aiñ Land Transfer Act wei ym tip u wa lada em ki bru kiwa emyatoh ki MLA tangwa da leh katkam ki kyndon ka aiñ manda e yei thaw.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U Kyrmen da pyntip u leh wa ka bai chim wai yei thaw iwa da e cha ki seiñ niam wei wow leh yei kaam niam man ko 5% nei dor i thaw heitu i por wa soi soskular wei kini ki thaw toh kiwa tip kam ki Un-Encroached Land katwa ki thaw wa tip kam ki Encroached Land ka bai wai man ko 25% nei dor i thaw.

Lada pynemkaam yow rep wa kiwi kiwa emkaam ka imlang sahlang, i dor bai wai man ko 10% nei dor i thaw iwa man kam i Non-Encroached Land katwa ha kiwa man Encroached Land won 45% na i dor i thaw.

Lada pynemkaam yow chna yung bru, i bai wai man i 50% nei dor i thaw iwa man kam ki Non-Encroached Land katwa 100% nei dor i thaw lada man kam i Encroached Land.

Neibynta wow chna ya ki yaaw ki haat u man ko 100% nei dor thaw iwa man kam i Non-Encroached Land wa 150% nei dor i thaw wa man kam i Encroached Land.

U Leader of Opposition, u Ronnie V Lyngdoh da kylli u wa lada em ki bru kiwa da sah pyrchah aiñ ha ki thaw sorkar kamwa da mih khubor ini wa dep iwa da jia ha Maxwellton Estate, Shillong neibhah manda kwah ka sorkar u leh ya iwon iwon da jooh chem wym yoh thaw bait.

U Kyrmen da ong u wa ka sorkar ym e ko yei thaw cha kiwon kiwon ki bru khlem da yoh bor wei u yada ko leh yei thaw yong ka.

U MLA ka Mawlai, u Brightstarwell Marbaniang da kylli u wa lada ka sorkar tip ko wa em boon ki thaw wa em ha Forest Colony Shillong da chim da ki bru ki wym toh kiwa kreh hapoh ka chnat Forest, heiwa u Kyrmen da ong u wym tip u yeini.

U Kyrmen da pyntip u leh wa waroh i thaw wa da e wai wa kynthup cha ki chnat sorkar toh 372.9468 Hectare wei i thaw wa dang em ka sorkar ha Shillong toh 381.9468 Hectare.