U Symbood Montri Rangbah ka jylla, u Prestone Tynsong da ong u wa neiliang ka sorkar da dep ko wow kyrpaad ya ka High Court ka Meghalaya wow e laad u pynkrehkaam ya ka Roster System deiwa kheiñ neini chakhmat ymtoh chadien, tangwa ha itu i por neiliang ka yung bichaar da ban bait ko wa toh u pynkrehkaam ya ka Roster nadooh wa da pynkrehkaam ya ka Reservation Policy.
Katkam i khana u Prestone, hadien wa da pynmih hukum ha u 2022 da ka High Court wa toh u pynkrehkaam ya ka Roster System, neiliang ka sorkar da booh ko ya ki Affidavit hadooh 3 sien, wei da kyrpaad leh na ka High Court wow e laad u pynkrehkaam ya ka Roster System khlem da kheiñ nadooh ki snem wa da dep.
U Prestone da ong u wa ya katni hadien wa ka yung bichaar da ieh ko hei stat yong ka sorkar wa kamjooh ka yung dorbar wow rai kammon u pynkrehkaam ya ka Roster System, mar ya liwan u Montri Rangbah daw khut ya ka yalang ka dhab ki Montri (Cabinet), ka yalang yong ka MDA wei kamjooh ya ka yalang yong waroh ki seiñ saiñpyrthai wow yatai kammon wow lai chakhmat.
