Jowai: Ka Confederation of Hynñiewtrep Social Organisation (COHSO) chirup wa ka Garo Hills Joint Action Committee (GHJAC) ynne ka sngi da sdang ki ya ka yakhih chah thngan ha thaw pynyieñ kari ka Additional Secretariat Shillong wow pyrchah ya ka BJP wa ki MP hapoh ka sorkar NDA kawa da mynjur ya CAB (Citizenship Amendment Bill 2016) hapoh Parliament.
U Robertjune Kharjahrin uwa man kam u Chairman ka CoHSO da ong u wa ki seiñbhalang waroh na ka thaaiñ mihsngi da pyrchah ki ya kani ka Bill nadooh wa wanrah ya ka ha u 2016 deiwa pynrap wa ki seiñbhalang kamjooh ki seiñ saiñ hima wot ki sorkar jylla na ka thaaiñ da pynsñiaw ki yei pyrchah ya ini i thmu hakhmat ka Joint Parliamentary Committee (JPC).
Da ong u wa heithaw wow pyrkhat biang ka JPC yeini i pyrchah iwa ye wow ktah ya ki khian paaid ka sorkar BJP dei buit poh da lai bait ko chaphrang hajrong ini i pyrchah khlem pynkylla ya kani ka Bill.
Ya kani ka chah-thngan da thmu wow pynman le sngi tangwa da yohbor du ynne ka sngi neibhah wa ka 25 tarik toh ka National Voters Day wa ka 26 tarik toh ka Republic Day.
Hajrong wa dang sah ko su hapoh Rajya Sabha wow yoh ko yei mynjur wow man aiñ ko (CAB), u Kharjahrin da ong u wa wot ki party wa em ha ka NDA kam ka Shiv Sena, ka JDU tieñsar ki ya pynman aiñ chipor ko ya ka kam ka Ordinance. Da pynrap u leh wa ym em kheiñstiñ ki wei ini i yakhih leh man i chibynta wow kyntu yaki MP hapoh Rajya Sabha wow pyrchah ki ya kani ka CAB.
Hajrong i pynkylla ya ka Sixth Schedule ka riti synchaar ka ri ka wow pynkhlan ya ki District Council, u Kharjahrin da ong u wa iyi u myntoi ini hawa thmu ki wow pyndooh ya ki hadien wa pynman aiñ ya ka CAB.
Ya kani ka chah-thngan da pynkut noh pyn ynne ka sngi heipor 3:00 waje wow pynkhreh won ya ka Dorbar Bah ka wow pynman ha ka 31 tarik uni u bnai hajrong ka CAB.
Discussion about this post