Da ka e sikai wa kyrpang pynman ka WJHKA yow pynkhai im biang ya ka yalehke Karate

Ki bor pait bor pynlai ka West Jaiñtia Hills Karate Do Association (WJHKA) wa kynthup yow Alan Niangti (2nd Dan Shotokan Black Belt) uwa man leh kam u President ka WJHKA, u E. Manbha Kynjin (1st Dan Blackbelt) kam u General Secretary WJHKA, u Wyraiki Kharbukhi, Vice-President, u Yatha Chyrmang, Asst. General Secretary (1^st Dan Blackbelt), u Pynioochwa Phira, Treasurer (1^st Dan Blackbelt) wa u Ribait O Pde, Auditor (1^st Dan Blackbelt), u Na Oo Man Kiwi War Passah (2nd Dan Blackbelt), Instructor hadien i pynkhai im biang ya kani ka jait yalehke Karate hapoh ka District ha kani ka tayaaw nadooh 7 tarik hadooh ka 12 tarik uni u bnai, da chimkhia ko wow pynman i e sikai wa kyrpang ya ki khynnah ha Yungwalieh ka Loompyrdi Iongpiah, Jowai.

Ha kani ka Special Training Camp wa chitayaaw da wan wow embyntalang leh da ki dkhot ka All Meghalaya Karate Association (AMKA) wa kynthup yow Donboklang Lyngdoh (5th Dan Blackbelt) najrong kiwi ki dkhot ka AMKA.

Ki rukom sikai kiwa da leh da pynyoo hapyrdi ki khynnah toh kiwa man katkam ka rukom dustur yong ka Karate wa kynthup ya ki Exercise, Punching, Kicking, Blocking, Self-Defense wa kiwi kiwa yatoh wei rukom saiñdur saiñdar yei doh i pran.

Ya kani ka Special Training Camp da pynkut ka ynne hei wan sakhilang u Khroobok Passah, DSO West Jaiñtia Hills kam u kongsan.

Related posts

Wan sakhilang u Eugeneson ya ka Final ka 6-A-Side Knockout Football Tournament ka Lion Sports and Youth Affairs

June 22, 2025

Da ka yalehbol wei pynsñiawthooh paidbah pynman ki pulit ka WJH wow yakhun ya i drugs

June 22, 2025

U Alan Niangti hei e kyntien yahkhmat da khana u wa ka thong i pynman ya kani ka Training toh chibynta kam i pynkhreh ya ka State Tournament ka wow man ha Shillong wa ya ka Meghalaya Games ka wow man hapoh ka District ha u snem 2025.

Neiliang u Alan Niangti e u leh i sñiawngooh sñiawburom wa khroo ya ki manbei manpa kiwa da pynchlur ya ki khon yong ki wow ya embyntalang ha kani ka jait yalehke wei kyrmen u leh lyngba i kreh chitom wei yaichah ki khynnah ka District daw yoh ko u rah yei naam i burom ha kini ki Tournament.

U Donboklang Lyngdoh hei klam i kappæ yong oo, da khana batai u chaphang ki yurim yong ka Karate kam kawi na ki jait yalehke wa ye u e myntoi ya ki khynnah ha kiwa boon ki rukom wei kyrpang chooh leh da kyrsu kyntu u leh ya ki khynnah wow man kiwa tip u ri syndong yei akor i burom wei wym toh u mylliñ yei puræ puthi.

Khana u leh lyngba ka Karate kitu ki khynnah wa em sap, man ko i kyrkhu wa khroo ya ki heiwa yoh laad ki wow psiah hapoh ka State Authority of India (SAI) hei wow pynpliah pynjanai chooh chooh yei sap i ka-it yong ki.

U Khroobok Passah hei e kyntien kam u kongsan dap u dei sñiawkmen wa khroo wa da ye biang u pynkhai im ya kani ka jait yalehke hapoh ka District, e mynsien u leh ya ki khynnah deiwa ong, kynmoo ka Karate toh ka jait yalehke kawa hap u kreh chitom da idæ samen samen kamtæ kyrmen, yooluti u wa lyngba i chah yap yong ki khynnah wei kitkhia yong ki bor pait bor pynlai kani ka Association, ka District daw yoh ko u rah yei naam i burom ha ka Meghalaya Games 2025.

Chooh chooh da ong u leh kam u DSO yong ka West Jaiñtia Hills kular u wow yakrehlang wa kani ka Association ha kiwon kiwon ki por khnang yow ye u kyntu kynrong ya kani ka jait yalehke na ki por cha ki por.

Hei wakut yong kani ka yalang, neiliang u Ribait-O Pde e u i sñiawngooh ya waroh kiwa da embynta hei wow pynman ya kani ka Special Training Camp kawa jop wei kawa lai ryntih.