Shillong: U montri ka sorkar pyrdi wa pait ya ka Social Justice and Empowerment, u Thaawarchand Gehlot ynne da pyntip u wa ka chnat yong oo da rai ko wow chna ha Meghalaya ya kawi na ki san tylli ki National Sports Stadium kiwa ryngkat kyrdan wa kiwi ha pyrthai (International Standard) neibynta kiwa em i duna ha i doh i pran.
Kani ka Stadium u chongdor ko hadooh kamwa Palat T. 200 klur deiwa pynrap wa ka Composite Regional Centre leh daw chna ya ka hapoh jylla, wei yeini da ong u ha ka Samajik Adhikarita Shivir, wa saam tiar cha kiwa em i duna ha i doh i pran hapoh ka Assistance to Disabled Person Scheme ynne ha Shillong.
U Gehlot da ong u wa ka Ministry thrang ko wow chna ya kini ki stadium ha ki san tylli ki jylla ka ri wei kawi na ki toh ka wow chna ha Meghalaya hadien wa u Montri Rangbah da yachem u wa oo wow paan yarap wei da kular leh wow e i thaw wa heh 50 acre neibynta i jooh.
Da pyntip u wa ka katni dang pynkhreh ya ka Detail Project Report (DPR) wei kani ka Stadium toh u pyndep ya ka chwa ka National Games 2022 deiwa pynrap wa deiwa em kani ka Stadium daw yarap ko wow pynman ya ka Special Olympics neibynta kiwa duna i doh i pran.
Heijooh i por u Gehlot da ong u wa kani ka saam tiar man ko kawa heh tam wei ka wyrta wa rah ko toh wow pyntip ya ki paidbah wa em kam kani ka scheme wei u tip leh wa hadooh katwon kini ki tiar man ki kiwa miat.
Da em hadooh 7000 tam kiwa yoh myntoi na kani ka scheme ha Shillong wa Tura ha ini i saam tiar wa ar sngi yeiwa ka sorkar pyrdi da pynlut ko hadooh kamwa T. 7 klur.
U montri rangbah, u Conrad Sangma da ong u wa i pyrkhat wow chna ya kani ka Stadium sdang i le soo bnai nachwa heipor wa yachem u ya u Gehlot.
U Conrad da ong u leh wa ya kani ka stadium daw pynemkaam ya ka ha ka National Games 2022 deiwa ong wa ini da pynhun mynsien i ya oo wow yoh ya kani ka Stadium hapoh jylla.
Discussion about this post