Da ka Reservation Policy ka jylla u pynkrehkaam ha ki Residential School

Ka sorkar India lyngba ka ka Ministry for Tribal Affairs da mynjur ko wow pynkrehkaam da ka Job Reservation Policy yong ka jylla Meghalaya hawa yatoh wa i thung kaam ha ki 40 tylli ki Eklavya Modern Residential School (EMRS). Hajrong ini, neiliang ka sorkar jylla hapoh i yahkhmat u Montri Rangbah wa u Montri ka chnat puræ puthi da yachem ki ya u Montri ka sorkar pyrdi ha Delhi.

U Lahkmen Rymbui da ong u wa ka sorkar jylla ym yahap ko wa ki khon khynroo khyllood ka jylla u dooh ki ya ka laad yoh kaam ha ki EMRS, wei neiliang ka sorkar da pyrchang ko wow yaklam wa ka Ministry for Tribal Affairs wow pynkrehkaam da ka Job Reservation Policy ka jylla kattu la chi snem, heiwa da pyntip wa ha ka sngi wa ar kani ka tayaw leh da yaklam ya kani ka phang heiwa ka sorkar India da e laad ko neibynta ka Meghalaya wow thung kreh ha ki EMRS wow lai ko katkam ka Reservation Policy yong ka jylla.

U Montri wa pait ya ka chnat puræ puthi ka jylla da pyntip u leh wa i slem wow pyndep ya ki Eklavya Modern Residential School hapoh ka jylla toh neidaw wa i thung kreh heiwa ka sorkar pyrdi ka kwah ko wow pynlai hi na Delhi, wei katkam ka Reservation Policy ka sorkar India, i bhah neibynta ki Schedule Tribe man ko du 7.5%, ya iwa ka sorkar jylla ym sñiaw yahap ko.

Da ong u wa kini ki skur, ka sorkar jylla da yooluti ko wa ym du wow yarap yei bha i miat ya ka thaw puræ, tangwa wow yarap leh hawa yatoh wa i yoh kaam yoh jaam ki khynroo khyllood. Da ong u wa ka jylla Meghalaya ka em ko ka yong ka hi ka Job Reservation Policy wei lada lai katkam ka Policy yong ka sorkar India, kiwa boon ki khynroo khyllood kiwa da biang ka puræ puthi ym yohlaad ki wow kreh ha kitai ki skur.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Ha iwi won i liang, u Rymbui da pynsñiaw u yei sñiawngooh ya u Montri ka sorkar pyrdi wa pait ya ka Ministry for Tribal Affairs, u Arjun Mondal uwa da mynjur wow pynkrehkaam da ka Reservation Policy yong ka jylla hawa yatoh wow thung kaam ha ki EMRS, wei da pyntip u leh wa u Montri Rangbah ka jylla, u Conrad K Sangma daw chna u ya kawi ka Committee wow pait yei lai smat kitai ki skur.